У Гарадзенскай вобласці ДАІ спыніла маршрутку і аштрафавала кіроўцу і пасажыраў
15- 5.03.2024, 12:41
- 11,520
![У Гарадзенскай вобласці ДАІ спыніла маршрутку і аштрафавала кіроўцу і пасажыраў](https://i.c97.org/p/articles/ai-236023-aux-head-20162912_gai_360.jpg)
За што?
Кіроўца міжгародняга рэйса ў Гарадзенскай вобласці расказаў, як ён сам і яго пасажыры "трапілі" на штрафы даслоўна на старце паездкі. І праблема была не ў абсталяванні транспарту і не ў аплаце за праезд, піша telegraf.news.
“Выконваў звычайны міжгародні рэйс. Перад выездам з аўтавакзала ў Свіслачы папрасіў пасажыраў прышпіліцца. Прайшоўся па салоне, паглядзеў, ці ўсё гэта зрабілі. Праз некалькі хвілін маршрутку спыніў патруль ДАІ”, - распавёў кіроўца.
Пакуль адзін інспектар правяраў дакументы, іншы ўважліва паглядзеў у салон, апісалі развіццё сітуацыі ў Міжрэгіянальнай асацыяцыі перавозчыкаў (МАП). Высветлілася, што адразу пасля адпраўлення многія пасажыры рамяні адшпілілі.
"А зараз уявіце здзіўленне гэтых людзей, калі інспектар стаў складаць на іх пратаколы за тое, што ехалі без пасу бяспекі", – панаракаў кіроўца.
І з крыўдай дадаў, што сам таксама атрымаў штраф за перавозку непрышпіленых:
“Як я магу кантраляваць падчас паездкі паводзіны пасажыраў? Мая галоўная задача - сачыць за тым, што адбываецца на дарозе, а не за тым, што там робяць людзі ў салоне”.
Дарэчы, для яго гэта быў не першы такі выпадак, таму штраф быў вялікім - 80 рублёў.
Каму можна не прышпільвацца?
Ва ўправе ДАІ УУС Гарадзенскага аблвыканкама нагадалі, што калі транспартны сродак абсталяваны пасамі бяспекі, то прышпільвацца неабходна. Выключэнне ў маршрутцы можа быць толькі для цяжарных ці тых, каму пас проціпаказаны паводле медыцынскіх паказчыкаў.
З пачатку года ў Гарадзенскай вобласці за паездкі без пасу да адказнасці прыцягнулі ўжо больш за 350 пасажыраў аўто і аўтобусаў.
А ці рэальна кіроўца вінаваты?
У Міжрэгіянальнай асацыяцыі перавозчыкаў адназначна сталі на абарону кіроўцаў. Там упэўнены: калі пасажыр адшпіліў пас падчас руху, то прыцягваць да адказнасці кіроўцу ў гэтым выпадку не зусім дакладна.
“У вялікіх аўтобусах і бусах на некалькі дзясяткаў чалавек вельмі складана кантраляваць тое, што адбываецца ў салоне. Не будзе ж кіроўца спыняцца кожныя некалькі хвілін і правяраць, ці ўсе прышпіленыя?”, - аргументавалі ў МАП.
І выступілі з ініцыятывай, што, магчыма, трэба перагледзець практыку менавіта для такіх выпадкаў.