Сталі вядомыя новыя падрабязнасці аб забароне вывазу аўто ў Беларусь праз Літву

У некаторых выпадках беларусам удаецца прайсці літоўскую мытню.

Учора стала вядома аб тым, што Літва забараняе вываз аўтамабіляў з рухавіком 1,9 л і больш і коштам звыш 50 000 эўраў.

Чытачы autogrodno.by пішуць, што ўсё ж ім удавалася перасекчы мяжу.

Напрыклад, чытач паведаміў, што пасля выхаду ўчорашняй навіны прыехаў на Мядзінінкай на БМВ з рухавіком 3,0 і літоўцы прапусцілі. Іншыя карыстальнікі таксама пішуць, што адны аўтамабілі праязджаюць, іншыя не.

Больш падрабязна пра сітуацыю расказвае ABW.BY:

Для праходжання літоўскай мытні на гэты момант абавязкова наяўнасць менавіта літоўскай экспартнай дэкларацыі, якая пацвярджае набыццё аўтамабіля ў краіне. Новаўвядзенне закранула як юрыдычныя, так і фізічныя асобы.

Цягам дня 29 сакавіка на літоўскім баку таксама назіраўся збой у працы базы электронных дэкларацый: мытнікі проста не бачылі ў базе адкрытыя EX, што стварыла дадатковыя цяжкасці. Разварочвалі ўсе аўтамабілі на транзітных нумарах.

На гэты момант, каб прайсці літоўскую мытню, неабходна выкананне некалькіх умоў:

аплата за аўтамабіль павінна быць зробленая ад грамадзяніна Рэспублікі Беларусь непасрэдна прадаўцу;

аўтамабіль павінен быць набыты ў Літве або імпартаваны ў краіну літоўскай кампаніяй;

аўтамабіль не павінен трапляць пад санкцыі (аб'ём рухавіка да 1,5 літра, кошт да €50 000).

Акрамя гэтага, пасля растаможвання аўтамабіля пакупнік павінен на працягу 30 дзён падаць мытным органам Літвы аформлены ў Беларусі тэхнічны пашпарт, мытнае пасведчанне і мытную дэкларацыю на тавар. У адваротным выпадку ў фірмы-прадаўца могуць узнікнуць сур'ёзныя праблемы - аж да спынення дзейнасці.

Адносна аўтамабіляў, якія ідуць транзітам праз літоўскую тэрыторыю з ЗША, праблем пакуль не было.