Жодзінская «Тарпеда-БЕЛАЗ» упершыню выйграла Суперкубак Беларусі

Лёс футбольнага матча вырашыла серыя пенальці.

У Салігорску 2 сакавіка адбыўся першы афіцыйны матч сёлетняга футбольнага сезона. Жодзінская «Тарпеда-БЕЛАЗ» у гульні за Суперкубак Беларусі падолела ў пенальці менскае «Дынама» – 4:3, піша «Трыбуна».

У матчы за трафей «Дынама» гуляла на правах чэмпіёна краіны 2023 года, а «Тарпеда-БЕЛАЗ» – уладальніка Кубка Беларусі. Цікава, што ніводная з каманд дагэтуль не перамагала ў Суперкубку, які разыгрываецца ў Беларусі з 2010 года.

Спаборнікі аднолькава няўдала выступілі летась на міжнароднай арэне. У Лізе канферэнцый «Дынама» па суме двух матчаў саступіла баснійскаму «Жалезнічару», а «Тарпеда-БЕЛАЗ» вылецела з турніру, прайграўшы кіпрскаму клубу АЕК.

Гульня ў Салігорску атрымалася сумнай да перапынку. У другім тайме футбалісты з Жодзіна выглядалі паважней, але ўпусцілі пару добрых момантаў у канцоўцы.

Згодна з рэгламентам пасля асноўнага часу матча адразу рушыла ўслед серыя пенальці. «Тарпеда-БЕЛАЗ» была больш удачлівай – 4:3.