Сталі вядомыя дата і месца развітання з Навальным

Пра гэта паведамілі паплечнікі забітага палітыка.

Дату і месца развітання з памерлым у расейскай калоніі Аляксеем Навальным паведамілі паплечнікі палітыка.

«Адпяванне Аляксея адбудзецца ў царкве абраза Божай Маці «Супакой мой смутак» ў Мар'іна 1 сакавіка а 14.00. Прыходзьце загадзя. Пахаванне пройдзе на Барысаўскіх могілках», - напісала прэс-сакратарка Навальнага Кіра Ярмыш.

Нагадаем, 16 лютага ФСВП Расеі паведаміў аб смерці палітвязня Аляксея Навальнага. У паведамленні пазначана, што ён памёр у калоніі пасля шпацыру. Следчы камітэт РФ арганізаваў працэсуальную праверку паводле факту смерці апазіцыянера.

22 лютага маці Аляксея Навальнага Людміле паказалі цела сына і далі пазнаёміцца з высновай. У дакуменце пазначана, што ягоная смерць наступіла ад "натуральных прычын".

23 лютага паплечнікі Навальнага заявілі, што следчы запатрабаваў ад маці палітыка на працягу трох гадзін пагадзіцца на таемнае пахаванне. У адваротным выпадку ён прыстрашыў пахаваць цела проста ў калоніі.

24 лютага Юлія Навальная паведаміла, што за дзеяннямі следчых, якія адмаўляюцца выдаць цела яе мужа, стаіць Уладзімір Пуцін. У той жа дзень цела Навальнага аддалі маці.