Расейка паскардзілася, што не можа атрымаць ДНЖ у Беларусі

У чым прычына?

Расейка Алена Злаціна расказала ў Tik-Tok аб тым, як спрабавала атрымаць дазвол на жыхарства ў Беларусі. Сваёй мэтай знаходжання яна вызначыла “любоў да беларускага сала”.

Ролік расейкі з нікам zzlatalenchik сабраў тысячы праглядаў і сотні гумарыстычных каментароў. Дзяўчына шчыра падзялілася гісторыяй аб тым, як спрабуе атрымаць дазвол на жыхарства ў Беларусі.

“Мяне прымушаюць перапісваць аўтабіяграфію. Аўтабіяграфія пішацца ад рукі і трэба пазначыць мэту. Я пісала, што дужа моцна люблю ваша сала, але не пасуе” - абурылася расейка ў сваім відэароліку.

Каментатары тут жа пажартавалі аб тым, што яе гастранамічныя перавагі трэба скарэктаваць:

“Паспрабуйце пазначыць бязмерную любоў да бульбы!!! Думаю, гэта аргумент…”, - напісаў адзін з карыстальнікаў.

“Напішы, што больш за ўсё любіш бульбу”, - паўтараў яму іншы.

Трэці нават нагадаў пра "агуркі і скваркі", а нехта парэкамендаваў напісаць, што "дарогу [трэба] толькі на зялёнае святло пераходзіць".