У Польшчы на мяжы з Беларуссю затрымалі ўкраінскага журналіста
- 27.02.2024, 19:40
- 9,192
![У Польшчы на мяжы з Беларуссю затрымалі ўкраінскага журналіста](https://i.c97.org/ai/585392/aux-head-1709051984-20240101_put_360.jpg)
Ён здымаў сюжэт аб гандлі краіны з РФ.
У Польшчы каля мяжы з Беларуссю праваахоўнікі затрымалі журналіста «Украінскай праўды» >Міхаіла Ткача разам з аператарам падчас здымкі матэрыялу аб гандлі краіны з РФ і Беларуссю. Пра гэта паведаміў Ткач, яго цытуе «Украінская праўда» 27 лютага.
Адзначаецца, што сітуацыю ўдалося развязаць толькі пасля агалоскі і ўмяшання пасольства Украіны ў Польшчы.
«Ля мяжы Польшчы з Беларуссю да нас пад'ехалі польскія паліцыянты і паказалі значок. Мы паказалі нашыя дакументы і пасведчанні журналісцкія. Яны пачалі хапаць нашы камеры, абшукваць...Далей нас прывезлі ў камендатуру. Амаль 10 чалавек пачалі абшукваць наш аўтамабіль, нас, выкінулі нашы рэчы на капот, забралі ўсе карткі памяці з камер, забралі ўсе тэлефоны, дакументы», - распавёў Ткач.
![](https://i.c97.org/ai/585392/aux-1709051991-2222.jpg)
З яго слоў, на допыце ў камендатуры ён паведаміў, што прадстаўляе СМІ і сказаў, што здымае матэрыял, як Польшча гандлюе з краінай-агрэсаркай РФ праз Беларусь і самой Беларуссю - «як сельскагаспадарчая прадукцыя ідзе з Расеі і Беларусі ў Польшчу».
Паведамляецца, што Ткача і аператара ўтрымлівалі ў камендатуры не менш за чатыры гадзіны і адпусцілі толькі пасля дазволу «зверху». Пры гэтым ім не дазвалялі ні з кім звязацца, а ў польскай камендатуры дапытвалі не толькі паліцыянты, але і прадстаўнікі спецслужбы.
![](https://i.c97.org/ai/585392/aux-1709051990-1111.jpg)
Украінскае выданне падкрэсліла, што некаторыя знятыя матэрыялы журналістамі былі выдаленыя з карт памяці. Журналісты размаўляюць з адвакатамі.