У ААН занепакоеныя станам Рыгора Кастусёва, з якім жорстка абыходзяцца ў калоніі
5- 27.02.2024, 15:08
- 4,570
![У ААН занепакоеныя станам Рыгора Кастусёва, з якім жорстка абыходзяцца ў калоніі](https://i.c97.org/p/articles/2015/ai-169421-aux-head-20150917_kostusev_360.jpg)
У палітыка анкалагічнае захворванне.
Эксперты ААН у правах чалавека выказалі занепакоенасць у сувязі з паведамленнямі аб крытычным стане здароўя і жорсткім абыходжанні з 66-гадовым палітвязнем Рыгорам Кастусёвым, які адбывае ў калоніі 10-гадовы тэрмін паводле справы аб «дзяржаўным перавароце». Адмову ў меддапамозе палітвязню прыраўнялі да катавання.
«Ненаданне належнага медыцынскага лячэння і догляду зняволеных у крытычным стане парушае міжнародныя абавязанні Беларусі ў галіне правоў чалавека, паводле якіх з асобамі, пазбаўленымі волі, неабходна абыходзіцца гуманна і з павагай да іх чалавечай годнасці. Гэта можа быць нават роўна катаванню», - гаворыцца ў заяве.
Там зазначаецца, што несвоечасовае выдача турэмнай медыцынскай службай вынікаў медыцынскага абследавання Кастусёву, ягонаму адвакату і родным пазбавіла палітвязня магчымасці дамагацца вызвалення з-пад варты паводле медыцынскіх сведчанняў.
«Як паведамляецца, нягледзячы на ўзрост і стан здароўя, Кастусёў неаднаразова зазнае больш суровыя ўмовы ўтрымання пад вартай, чым прадугледжаныя прысудам, і быў пазбаўлены магчымасці абскардзіць гэтыя дзеянні праз адсутнасць эфектыўных сродкаў прававой абароны», – заявілі экспэрты.
Яны заклікалі беларускія ўлады разгледзець пытанне аб памілаванні, змякчэнні пакарання для Кастусёва ці замене зняволення альтэрнатыўнай формай пазбаўлення волі.
Нагадаем, раней Рыгор Кастусёў скардзіўся на дрэннае самаадчуванне. У няволі ў палітыка абвастрыліся праблемы са здароўем - у яго анкалагічнае захворванне.
У жніўні мінулага года Кастусёў прайшоў анкалагічнае даследаванне, аднак прынамсі да восені яму не паведамлялі аб выніках. Пры гэтым палітыка некалькі разоў адпраўлялі ў штрафны ізалятар і ПКТ.