Мікіта Журавель атрымаў у Чачэніі 3,5 гады калоніі ў справе аб спаленні Карана
- 27.02.2024, 11:12
- 2,604
![Мікіта Журавель атрымаў у Чачэніі 3,5 гады калоніі ў справе аб спаленні Карана](https://i.c97.org/ai/585295/aux-small-1709021527-3244.jpg)
Суд Грознага вынес прысуд расейцу.
Да трох з паловай гадоў калоніі прысудзіў раённы суд Грознага абвінавачанага ў спаленні Карана Мікіту Жураўля, перавезенага на час следства ў Чачэнію і там збітага сынам Рамзана Кадырава, паведамляе ВВС.
Крымінальная справа была распачатая паводле ч. 2 арт. 148 і ч.2 арт. 213 КК РФ - абраза пачуццяў вернікаў і хуліганства.
Следчы камітэт Расеі сцвярджаў, што на адным з допытаў Журавель даў паказанні аб тым, што спаліў Каран нібыта на загад украінскіх спецслужбаў за ўзнагароду 10 тысяч рублёў.
19-гадовага Жураўля арыштавалі ў траўні 2023 года. Справу супраць яго распачалі пасля таго, як відэа са спаленнем Карана ў мячэці ў Валгаградзе з'явілася ў інтэрнэце.
З асабістага распараджэння кіраўніка СКР Аляксандра Бастрыкін і нягледзячы на пратэсты праваабаронцаў юнака перавезлі ў Чачэнію, дзе і прайшоў суд.
У канцы верасня таго ж года кіраўнік Чачэніі Рамзан Кадыраў апублікаваў відэа, на якім яго сын Адам збівае Мікіту Жураўля. У допісе, які суправаджаў відэа, Кадыраў-старэйшы пісаў, што ганарыцца ўчынкам сына.
У іншым, пазнейшым відэа, кіраўнік Чачэніі заявіў, што не бачыць прычын для пакарання сына і мяркуе, што «было б добра», калі б ягоны сын забіў Жураўля.
Публікацыя роліка выклікала хвалю абурэння ў сацсетках. Расейскія ўлады па сутнасці так і не каментавалі відэа, хоць, на думку юрыстаў, апытаных ВВС, людзей, якія маюць дачыненне да паказанага на відэа збіцця, як і распаўсюду гэта відэа Кадыравым, можна прыцягнуць да адказнасці як мінімум паводле дзевяці артыкулаў расейскіх законаў.
Пасля збіцця арыштанта сын Кадырава атрымаў мноства высокіх пасад і ўзнагарод
МУС Расеі адмовілася распачынаць крымінальную справу. Як паведамлялі расейскія СМІ, у Адама Кадырава, якому на момант збіцця было 15 гадоў, не наступіў узрост крымінальнай адказнасці.
Сын Кадырава, які збіў арыштаванага ў СІЗА, атрымаў трэцюю ўзнагароду за месяц
Пасля гэтага Адам Кадыраў быў узнагароджаны мноствам медалёў і ордэнаў -медалём "Герой Чачэнскай Рэспублікі", ордэнам "За заслугі перад Кабардзіна-Балкарскай Рэспублікай", ордэнам "Дуслык" ("Дружба") і іншымі.
15-гадовы сын кіраўніка Чачэніі атрымаў таксама некалькі пасадаў – стаў начальнікам аддзелу гарантавання бяспекі кіраўніка Чачэніі і куратарам батальёну Мінабароны, увайшоў у чачэнскі саўбез.