Суд аштрафаваў сталічную фірму на 230 тысяч рублёў
3- 27.02.2024, 10:49
- 6,202
![Суд аштрафаваў сталічную фірму на 230 тысяч рублёў](https://i.c97.org/p/articles/2016/ai-213836-aux-head-20160716_pravasuddzie_360.jpg)
Падаткавікі пракаментавалі: "Добра, але мала!".
Эканамічны суд Менска прызначыў сталічнай фірме штраф на 230 тысяч рублёў за парушэнне парадку набыцця, транспартавання і рэалізацыі тавараў. Падрабязнасці расказалі ва Управе аператыўных мерапрыемстваў менскай інспекцыі Міністэрства падаткаў і збораў.
Летась кампанія рэалізавала рознай аргтэхнікі і дэталяў амаль на 700 тысяч рублёў. Пры гэтым накладныя на тавар былі падпісаныя адной і той жа асобай - дырэктарам фірмы - як з боку грузаадпраўшчыка, так і грузаатрымальнікаў.
"Укладанне ўгоды адной і той жа фізічнай асобай, якая выступае ад імя розных суб'ектаў грамадзянскіх правадачыненняў, цягне на нікчэмнасць такой угоды", — нагадалі ў падатковай.
У фіскальным ведамстве падкрэслілі, што былі ўстаноўленыя і іншыя довады нелегальнага набыцця тавараў: прадмет угоды ў дамове не адпавядаў фактычнай наменклатуры тавараў у накладной; адсутнічалі разлікі паміж ТАА "В" і ТАА "А" за, нібыта, пастаўленыя тавары; рахункі-фактуры на адрас пакупніка прадаўцом не выстаўляліся.
“На прафесійным жаргоне такія накладныя называюцца „беставарнымі“ і не вартыя паперы, на якой яны афармляюцца”, — паведамілі ва Управе аператыўных мерапрыемстваў менскай інспекцыі Міністэрства падаткаў і збораў.
Эканамічны суд Менска прызнаў прадпрымальніка вінаватым у парушэнні парадку набыцця, захоўвання, выкарыстання ў вытворчасці, транспартавання і рэалізацыі тавараў. Фірме прызначылі 203 тысячы рублёў штрафу.
“Да гэтага хочацца дадаць толькі: „Добра, але мала!“, паколькі суддзя прымяніў да парушальнікаў штраф у памеры 30% ад кошту тавараў, пры максімальна магчымых 50%», — адзначылі падаткавікі, дадаўшы, што дырэктар фірмы “да апошняга адмаўляў зробленае” і суд “нават вяртаў справу на дапрацоўку”.