NYT: Буданаў уваходзіў у элітнае падраздзяленне ЦРУ
8- 27.02.2024, 8:27
- 16,038
![NYT: Буданаў уваходзіў у элітнае падраздзяленне ЦРУ](https://i.c97.org/ai/530893/aux-head-1672840315-202304_kirill_budanov_360.jpg)
Сталі вядомыя падрабязнасці аб ягоным рэйдзе ў акупаваны Крым.
Кіраўнік Галоўнай управы выведкі Міністэрства абароны Украіны Кірыл Буданаў уваходзіў у элітнае падраздзяленне «Атрад 2245», якое рыхтавала амерыканская Цэнтральная выведвальная ўправа.
Як гаворыцца ў артыкуле The New York Times, Буданаў быў адным з афіцэраў падраздзялення, якое захоплівала расейскія беспілотнікі і сродкі сувязі, каб тэхнікі ЦРУ маглі перапрафіляваць іх і ўзламаць шыфравальныя сістэмы.
«Генерал Буданаў быў узыходзячай зоркай у падраздзяленні 2245. Ён быў вядомы смелымі аперацыямі ў тыле ворага і меў глыбокія сувязі з ЦРУ. Агенцтва падрыхтавала яго, а таксама зрабіла экстраардынарны крок, адправіўшы на рэабілітацыю ў Нацыянальны ваенна-медыцынскі цэнтр Уолтара Рыда ў Мэрылендзе пасля таго, як ён быў паранены ў правую руку падчас баёў на Данбасе», - пішуць журналісты.
Падчас адной з аперацый Буданаў, перапрануўшыся ў расейскую форму, высадзіўся ў акупаваным Крыме, пераправіўшы байцоў праз вузкі заліў на надзіманых катарах. На паўвыспе ўкраінскіх байцоў сустрэла элітнае падраздзяленне спецыяльнага прызначэння РФ. Падчас бою акупанты панеслі страты - сярод забітых быў сын расейскага генерала. Затым украінская група адступіла да берагавой лініі і некалькі гадзін плыла на падкантрольную Украіне тэрыторыю.
Партнёрства было настолькі паспяховым, што ЦРУ захацела паўтарыць іх з іншымі еўрапейскімі спецслужбамі, арыентаванымі на супрацьдзеянне Расеі, піша газета.