Расейцы ўстанавілі 7-гадовы рэкорд па колькасці выпітага моцнага алкаголю
20- 26.02.2024, 19:51
- 5,858
![Расейцы ўстанавілі 7-гадовы рэкорд па колькасці выпітага моцнага алкаголю](https://i.c97.org/p/articles/ai-160274-aux-head-vodka_360.jpg)
Больш за ўсё моцны алкаголь п'юць у паўночных і далёкаўсходніх рэгіёнах РФ.
Продажы моцных спіртных напояў павялічыліся да 7,2 літраў на душу насельніцтва за год і дасягнулі максімуму за апошнія сем гадоў, прыводзіць ТАСС даследаванне аналітычнай службы аўдытарска-кансалтынгавай сеткі FinExpertiza.
«Продажы моцнага алкаголю ў крамах і ўстановах грамадскага харчавання павялічыліся да папярэдняга года ў натуральным вылічэнні на 3,6%, з 7 да 7,2 л на душу насельніцтва за год. Гэта максімальнае гадавое спажыванне на чалавека як мінімум з 2017 года, гэта значыць, за сем гадоў», - гаворыцца ў даследаванні.
Паводле звестак, да моцнага алкаголю былі аднесеныя гарэлка, каньяк, лікёры, пеністыя віны і іншыя напоі са змяшчэннем спірту звыш 25%. Звесткі аб аб'ёмах раздробнай рэалізацыі алкаголю былі супастаўленыя з сярэднегадавой колькасцю насельніцтва за разгляданыя перыяды.
Самым папулярным моцным алкагольным напоем у расейцаў стала гарэлка, яе спажыванне нязначна знізілася на 0,2%, да 5,3 літраў на чалавека, продажы каньяку выраслі на 10% да 1 літра на чалавека. Самым папулярным спіртазмяшчальным напоем засталося піва, гэтай прадукцыі прададзена ў 3,5 больш, чым усіх астатніх тыпаў алкаголю. Продажы піва таксама дасягнулі сямігадовага максімуму.
Больш за ўсё моцны алкаголь п'юць у паўночных і далёкаўсходніх рэгіёнах. Вінаробная прадукцыя лепш за ўсё рэалізуецца ў Паўночна-Заходняй федэральнай акрузе. Лідарам у спажыванні віна з'яўляецца Санкт-Пецярбург, дзе за год было рэалізавана 11 літраў на кожнага жыхара, гэта значыць, амаль удвая больш, чым агулам па краіне.
«Традыцыйна больш за ўсё моцнага алкаголю ўжываюць у рэгіёнах з суровым кліматам, у той час як у каўказскіх рэспубліках распіццё спіртнога зведзенае да мінімуму. Аднак варта ўлічваць, што яшчэ захоўваецца ценявы рынак алкаголю, які не ўлічваецца ў афіцыйнай статыстыцы продажаў», - заявіў член савета дырэктараў FinExpertiza Агван Мікаелян.
Паводле звестак Расалкагольтытунькантролю, продажы спіртных напояў у Расеі ў 2023 годзе выраслі на 4,3%. Без уліку піва, сідру і медавухі расейцы набылі ў крамах 229500000 дэкалітраў (2,3 млрд літраў) такой прадукцыі, гэта на 4,1% больш, чым у рэкордным 2022-м.
Паводле звестак Расстата, з 2022 года ў Расеі пачала павялічвацца колькасць людзей з дыягназам "алкагольная залежнасць". Усяго было выяўлена 54,2 тысячы такіх пацыентаў. З іх з алкагольным псіхозам (суправаджаецца галюцынацыямі, парушэннямі сну і іншымі сімптомамі) – 12,9 тысячы чалавек.
Між тым восенню мінулага года кіраўнік Міністэрства аховы здароўя Міхаіл Мурашка абвясціў аб перамозе над "алкагольным разгулам" у Расеі. З яго слоў, "значныя намаганні" ўладаў прывялі да фармавання "моды на здаровы лад жыцця і сацыяльную паспяховасць". Пры гэтым міністр прызнаў, што амаль кожны чацвёрты пацыент расейскіх стацыянараў мае праблемы са здароўем, звязаныя з ужываннем спіртных напояў, а паводле звестак МУС, у 2022 годзе 24,4% расследаваных злачынстваў у Расеі было ўчыненае ў стане алкагольнага ап'янення.