Што за суддзя Шоцік, якая асудзіла на смерць актывіста Ігара Ледніка
23- 26.02.2024, 11:23
- 12,568
![Што за суддзя Шоцік, якая асудзіла на смерць актывіста Ігара Ледніка](https://i.c97.org/ai/585150/aux-head-1708935535-20240226_szotik_360.jpg)
Яна дагэтуль не знаходзіцца нават пад санкцыямі.
Таццяна Шоцік - так клічуць 32-гадовую менскую суддзю, якая стабільна ўваходзіць у колькасць рэкардсменаў па колькасці рэпрэсаваных беларусаў. У 2022 годзе яна асудзіла барысаўскага актывіста Ігара Ледніка, удвая старэйшага за сябе, нягледзячы на відавочныя праблемы са здароўем, на тры гады калоніі. У 2024 годзе палітвязня не стала.
Таццяна Шоцік нарадзілася 21 студзеня 1992 года ў не самай бяспечнай сям'і. Як перадае “Белсат”, бацька будучай суддзі Віктар Шоцік за год да яе нараджэння быў асуджаны паводле ч. 1 арт. 107 Крымінальнага кодэкса БССР ("Прымяненне прымусовых мер бяспекі і лячэння да асоб, якія пакутуюць ад хранічнага алкагалізму, наркаманіі або таксікаманіі"). Яго нават абвяшчалі ў вышук. Праўда, гэта не вельмі дапамагло, бо ў 2013 годзе на мужчыну завялі ўжо адміністрацыйную справу за тое, што ён п'яным лаяўся ў гандлёвым доме "Купалаўскі". Яго дачка на той момант ужо працавала ў Галоўнай управе юстыцыі Мінгарвыканкама. У 2014 годзе яна пачала працу ў Менскім гарадскім судзе.
Суддзя-рэкардсмэнка
У кастрычніку 2019 года Шоцік была прызначаная суддзёй Ленінскага раёна замест суддзі Святланы Плотнікавай, якая знаходзілася ў сацыяльным адпачынку. І ўжо неўзабаве правяла свой першы палітычны працэс - у дачыненні да ўдзельнікаў пратэстаў супраць паглыблення інтэграцыі Беларусі і Расеі. Першай вядомай ахвярай 26-гадовай суддзі 9 студзеня 2020 года стаў паэт і былы кандыдат у прэзідэнты Уладзімір Някляеў, якога яна пакарала 30 базавымі адзінкамі штрафу.
Але ў поўнай меры суддзя Шоцік здолела разысціся ўжо пасля выбараў 2020 года і масавых пратэстаў, якія сталі адказам на фальсіфікацыі і гвалт сілавікоў. У выніку летам 2021 года яна заняла дзявяты радок у рэйтынгу самых рэпрэсіўных суддзяў Менска. А ўжо па выніках 2022 года стала самай рэпрэсіўнай суддзёй Беларусі, за год вынесшы прысуды ў крымінальных справах у дачыненні да не менш як 20 чалавек. З падлікаў Zubr, толькі да адміністрацыйных арыштаў Шоцік пакарала 1 608 днямі арышту, ці амаль на 4,5 гадамі. Адміністрацыйных штрафаў яна выдала на 41 559 рублёў.
З лета 2020-га так званая суддзя рэгулярна выкарыстоўвалася для палітычных рэпрэсій. Яе рэкорд - 7 пастаноў на дзень. Усяго паводле пастаноў Шоцік былі арыштаваныя як мінімум 200 чалавек, якія агулам атрымалі больш за 2000 дзён арышту.
![](https://i.c97.org/ai/585150/aux-1708935427-1.jpg)
Што тычыцца крымінальных спраў, то да “хатняй хіміі” Шоцік прысудзіла да 15,6 года, проста «хіміі» - на 19,2 гады, калоніі, у тым ліку ўзмоцненага рэжыму, - на 31,8 года. Яшчэ ў пяці выпадках крымінальных спраў адзначана, што прысуд невядомы.
Апошні вынесены ёю прысуд, пра які вядома праваабаронцам, датаваны 7 чэрвеня 2023 года.
Сярод яе ахвяр - былы брамнік каманды Беларусі Васіль Хамутоўскі, адвакат Андрэй Мачалаў, старшыня АГП Мікалай Казлоў, журналістка Надзея Калініна, менскі чыноўнік Юрый Сянькоў, мастак Аляксандр Нурдзінаў і нават праўладны рабін Ігаэл Ягудзі. Гэта Шоцік некалькі разоў судзіла сямейную пару Крупенічаў, якія ў выніку атрымалі дзевяць запар адміністрацыйных прысудаў.
Смерць Ігара Ледніка
Такое судзейства стаханаўскімі тэмпамі ў выніку прывяло да таго, што адзін з асуджаных Шоцік палітвязняў урэшце памёр у зняволенні: 20 лютага 2024 года стала вядома пра смерць барысаўскага актывіста Беларускай сацыял-дэмакратычнай партыі (Грамада) Ігара Ледніка. У яго спынілася сэрца. Медыкі спрабавалі рэанімаваць палітвязня, аднак беспаспяхова. Леднік памёр у Менскай раённай лякарні, куды быў дастаўлены з бабруйскай калоніі.
2 верасня 2022 года Шоцік прысудзіла яго да трох гадоў калоніі за артыкул “Міжнародна прызнаны нейтралітэт Беларусі – гарантыя бяспекі ў рэгіёне АБСЕ” ў партыйнай газеце, дзе нібыта быў паклёп на Лукашэнку.
Суддзю-рэкардсменку не спыніла і тое, што Леднік меў інваліднасць II групы з-за праблем з сэрцам. За некалькі месяцаў да суда актывіст страціў прытомнасць у камеры, яму ў экстраным парадку зрабілі аперацыю на страўнікава-кішачным тракце.
![](https://i.c97.org/ai/585150/aux-1708935427-2.jpg)
Пры ўсім гэтым Таццяна Шоцік дагэтуль не знаходзіцца нават пад санкцыямі.
Пасля смерці Ледніка галоўны прадстаўнік у пытаннях замежнай палітыкі і палітыкі бяспекі Еўрапейскай камісіі Петэр Стана паабяцаў, што рэжым "будзе прыцягнуты да адказнасці" за смерці палітвязняў.
Аднак сур'ёзных заходніх санкцый супраць рэжыму за тое, што ў Беларусі ёсць палітвязні, дагэтуль няма.