У Польшчы заявілі пра рост кантрабанды з Беларусі на 1000%
17- 23.02.2024, 21:00
- 9,034
![У Польшчы заявілі пра рост кантрабанды з Беларусі на 1000%](https://i.c97.org/ai/445345/aux-head-1637823827-20211125_polski-voenny_360.jpg)
Гэта адбываецца на фоне сталага ўзмацнення кантролю на мяжы.
Польскія памежнікі ў 2023-м годзе зафіксавалі рэзкі рост кантрабанды з Беларусі – больш чым на 1000% у асобных пазіцыях, у той час як год таму назіралася зніжэнне колькасці кантрабанды. Прытым гэта адбываецца на фоне сталага ўзмацнення кантролю на польска-беларускай мяжы, паведамляе Rzeczpospolita.
Паводле справаздачы галоўнай управы памежнай службы за мінулы год, больш чым на 1000% вырасла, сярод іншага, кантрабанда цыгарэтаў – было выяўлена нелегальных цыгарэтаў на 24 млн злотых (блізу 20 млн беларускіх рублёў у эквіваленце), у той час як год таму – усяго на 2 млн злотых (блізу 1,6 млн рублёў).
Як адзначае Rzeczpospolita, устаноўлены на мяжы Беларусі і Польшчы плот і арганізаванае ўздоўж яго дадатковае патруляванне «абмежавала кантрабанду людзей, але не спыніла арганізаваныя злачынныя групоўкі».
Прычым, мяркуючы з справаздачаў польскіх памежнікаў, павялічыліся аб'ёмы кантрабанды ў тым ліку і праз легальныя пункты пропуску: за мінулы год супрацоўнікі памежнай службы і іншых установаў забралі незаконна ўвезеных з Беларусі тавараў на 30 млн злотых (блізу 25 млн рублёў), у той час як год таму памер быў ажно ў 5 разоў меншы – 5,8 млн злотых (блізу 4,7 млн беларускіх рублёў).
Паводле звестак польскіх памежнікаў, у цэлым у два разы вырасла кантрабанда на польскіх межах не толькі з Беларусі, але таксама з Украіны і Расеі. Агульная памер выяўленай кантрабанды на ўсіх трох кірунках склаў амаль 50 млн злотых (крыху больш за 40 млн рублёў).