Жыхарка Пінска набыла няякасны абутак у інтэрнэт-краме, а ёй адмовіліся вяртаць грошы
6- 23.02.2024, 14:14
- 4,628
![Жыхарка Пінска набыла няякасны абутак у інтэрнэт-краме, а ёй адмовіліся вяртаць грошы](https://i.c97.org/p/articles/2015/ai-158709-aux-head-20150707_komp_magaz_360.jpg)
Але жанчына ўсё ж такі змагла вырашыць праблему.
Жанчына з Пінска купіла ў онлайн-краме абутак, але неўзабаве там трэснула падэшва. Вярнуць грошы за няякасны тавар прадавец не захацеў без правядзення экспэртызы. У выніку пінчанка звярнулася ў Дзяржкамітэт судовых экспэртыз, паведамляецца на сайце ведамства.
![](https://i.c97.org/ai/584835/aux-1708686749-1ejghuiaebhfguaruakuerygaerg.jpeg)
"Пры даследаванні абутку экспэрт прыйшоў да высновы, што дэфекты ў выглядзе расколін на падэшве з'яўляюцца схаванымі вытворчымі, прычынай іх утварэння сталі канструктыўныя асаблівасці дэталяў абутку і матэрыялы вырабу падэшвы", — гаворыцца ў паведамленні.
Атрымаўшы заключэнне экспэртызы, жанчына зноў звярнулася да прадстаўніка маркетплэйсу. Ён вярнуў ёй грошы за абутак, але, парушаючы закон, адмовіўся кампенсаваць выдаткі на экспэртызу.
У выніку ўрэгуляваць канфлікт удалося ў дасудовым парадку. Прадавец кампенсаваў жанчыне кошт экспэртызы, а таксама маральную шкоду сумай 400 рублёў і іншыя выдаткі, звязаныя з вяртаннем няякаснага тавару.