«На секунду ўзгадаў гэты ролік і зрабіў усё так, як там гаварылася»

Жонка вартаўніка, які выжыў пасля сутычкі з ваўком, расказала падрабязнасці інцыдэнту.

Воўк напаў на вартаўніка фермерскай гаспадаркі ў Хойніцкім раёне 26 лістапада. Жывёліна пакусала Міхасю Тарасенку рукі, учапілася ў нагу, але вартаўнік змог адбіцца і схавацца ў бытоўцы.

Сам Міхась распавёў «Онлайнеру», што дзейнічаў інтуітыўна.

«Усё адбылося, можа, за якую хвіліну. Было яшчэ цёмна, блізу пяці ранку, калі я пачуў брэх сабак і надумаў выйсці на вуліцу паглядзець, што там адбываецца. Адчыніў дзверы — і ўсё, што паспеў заўважыць, гэта сабак, што разбягаюцца, і ваўка, які ляціць да мяне. Ён схапіў мяне за нагу, я паспрабаваў разадраць яму пашчу, усунуў туды кулак і ў выніку адбіўся. Забег у бытоўку, падпёр дзверы і набраў першы нумар у мабільным - гэта быў нумар жонкі Наталлі», - успомніў Міхась.

Жонка адразу зразумела, што здарылася бяда: раней муж не тэлефанаваў ёй так рана.

«Ён мне ніколі ў такі час не тэлефанаваў, а тут чую: «Мяне пакусаў воўк, выкліч «хуткую» і МНС» — і ўсё, на гэтым ягоны голас абарваўся. У мяне пачалася поўная істэрыка, шок. Усё, што я паспела ў яго спытаць, гэта, ці жывы ён. Ужо потым Міхась мне распавёў, што не мог са мной размаўляць, бо звер кідаўся на дзверы вартоўні, а ён іх трымаў, сцякаючы крывёю», - распавяла Наталля.

Яна патэлефанавала суседу, а той набраў у міліцыю, «хуткую» і агульнага знаёмага Леаніда. Сябар, праўда, адразу выехаць на месца здарэння не змог: выйшаўшы на вуліцу, ён убачыў каля аўтамабіля яшчэ трох ваўкоў.

Пазней Леанід усё ж змог дабрацца да фермы. Ён патэлефанаваў Наталлі і паведаміў, што яе муж жывы, але сплывае крывёй. А ваўка застрэлілі міліцыянты - атрымалася далёка не з першага патрона.

«Міхася я ўбачыла ўжо ў шпіталі. Ён казаў, што міліцыя прыехала першай, і воўк пачаў кідацца на кіроўцу аўто». Толькі з восьмага патрона забілі таго ваўка, і толькі потым да Міхася змаглі падступіцца медыкі», - адзначыла Наталля.

А яшчэ яна прыгадала цікавы момант: выратаваць жыццё яе мужу мог ролік у TikTok.

«Незадоўга да гэтага Міша мне расказваў, што бачыў у TikTok ролік аб тым, што рабіць пры нападзе драпежніка, і, калі ўсё здарылася, ён прызнаўся, што на секунду ўспомніў гэты ролік і зрабіў усё так, як там гаварылася», - расказала Наталля.

Аналізы паказалі, што воўк быў хворы на шаленства. Цяпер Міхась праходзіць тэрапію: яму зрабілі ўколы вакол раны, у вену і пад лапатку. Прагнозаў па выпісцы лекары пакуль не даюць.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]