У ДАІ анансавалі новаўвядзенні для кіроўцаў

Яны датычацца «лістоў шчасця».

На вуліцах Менска ДАІ прадаўжаюць тэставаць інтэлектуальную сістэму, што ловіць кіроўцаў, якія парушаюць правілы дарожнага руху (ПДР). У снежні сістэма пачне (дакладная дата не паведамляецца) у аўтаматычным рэжыме рассылаць «лісты шчасця» тым, хто няправільна здзяйсняе прыпынак і паркоўку транспарту, расказалі ў ДАІ Менска. Пазней пачнуць фіксаваць парушэнні на МКАД і ў зонах, дзе аўтамабілям і матацыклам рухацца нельга.

Відэакамеры, якія фіксуюць праезд транспарту на забараняльны сігнал святлафора, ёсць у менскім мікрараёне Зялёны Луг на скрыжаванні вуліцаў Багдановіча і Шырокай. Пакуль яны працуюць у тэставым рэжыме, але плануецца, што ў 2025 годзе кантроль будзе весціся поўнасцю аўтаматычна, паведамляе «Люстэрка».

У ДАІ расказалі, што для таго, каб разумная сістэма магла паўнавартасна функцыянаваць, для кожнага скрыжавання распрацоўваюць праект на розную колькасць камераў. Пры гэтым будуць браць да ўвагі, якія правапарушэнні ДАІ плануе выяўляць у аўтаматычным рэжыме.

– Калі хочам кантраляваць выезд на паласу грамадскага транспарту або адсутнасць дамовы на абавязковае страхаванне, то камераў трэба няшмат. А вось калі стаіць задача выяўляць складаныя парушэнні, такія як праезд на чырвоны, то камеры трэба ставіць не толькі непасрэдна на скрыжаванні, але і на пад'ездзе да яго, і на дыстанцыі, – паведаміў намеснік кіраўніка ДАІ Менска Дзяніс Лівановіч.

Камеры толькі фіксуюць парушэнні, а выяўляе іх штучны інтэлект. Пакуль ён апрацоўвае звесткі пад наглядам чалавека, які паказвае яму на дапушчаныя памылкі. Цяпер дакладнасць праграмы ў частцы фіксацыі праезду на чырвоны даведзеная да практычна беспамылковай.

У ДАІ адзначылі, што інтэлектуальная сістэма ўмее распазнаваць рэгістрацыйныя знакі транспарту. Гэта дазваляе выяўляць адсутнасць тэхагляду і страхоўкі, рух па паласе грамадскага транспарту і іншыя парушэнні. Ужо са снежня яна пачне рассылаць «лісты шчасця» парушальнікам правілаў прыпынку і стаянкі.

– Вызначана блізу 10 зонаў у Менску, дзе будзем у аўтаматычным рэжыме выяўляць тых, хто не выконвае правілы прыпынку і стаянкі. Яны размешчаныя ў раёне буйных перасадачных вузлоў, спартовых комплексаў і аб'ектаў рэспубліканскага значэння, – удакладніў Дзяніс Лівановіч. – Неўзабаве сістэма пачне рэгістраваць парушэнне правілаў перасячэння чыгуначных пераездаў у Менскай вобласці. Паколькі яна ўжо ўмее распазнаваць нумары аўто і вызначаць яго месцазнаходжанне пры праездзе на чырвоны, складанасцяў на чыгуначных пераездах не будзе, бо алгарытм той самы.

У перспектыве з дапамогай камераў плануюць выяўляць парушальнікаў, якія ездзяць па забароненых для іх зонах. Размова ідзе пра матацыклістаў, якім нельга ганяць у начны час па праспекце Незалежнасці і вуліцы Леніна, а таксама пра грузавы транспарт, якому забаронена рухацца па цэнтральных праспектах Менска.

Дарэчы, сістэма ўжо навучылася распазнаваць твары, каб аўтаматычна вызначаць не толькі рэгістрацыйныя знакі, але і кіроўцаў, пазбаўленых правоў за п'янае кіраванне. Калі машына бяспраўніка трапляе ў аб'ектыў, сістэма выдае апавяшчэнне.

Што тычыцца МКАД, то сёння найбольш праблемны яе адрэзак – ад Дзяржынскага да Партызанскага праспектаў. Тут у асноўным адсутнічаюць палосы разгону і тармажэння, таму нават дробнае ДТЗ у гадзіну пік можа сур'ёзна ўскладніць рух. Паводле словаў Дзяніса Лівановіча, для запуску такой сістэмы кантролю на МКАД усталююць мноства радыёлакацыйных дэтэктараў. Яны будуць счытваць дарожнае становішча, а алгарытмы штучнага інтэлекту павінны прагназаваць яе развіццё. Праграмнае забеспячэнне інтэгруюць у існую аўтаматызаваную сістэму кіравання дарожным рухам Менска.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]