The Times: Брытанскае войска рыхтуецца да вайны ў лясах пры -20°C

Паблізу расейскай мяжы.

Брытанскія войскі рыхтуюцца да вайны ў лясах пры -20°C. Сваім досведам з брытанцамі дзеляцца фіны, піша The Times.

"Калі вы пацееце, вы памраце", - такое папярэджанне фінскі камандзір даў брытанскім салдатам, якія праходзілі трэнінг для вядзення баявых дзеянняў у прамёрзлых лясах паблізу расейскай мяжы.

Стоячы на снезе з аўтаматам RK 62 M1 на грудзях, лейтэнант Олі Таскінэн патлумачыў, што прамокнуць пры тэмпературы -20°C на паўночным фронце NATO было значна больш небяспечна, чым кантакт з расейскімі войскамі.

“Вы, напэўна, чулі пра Зімовую вайну ў 1940-х гадах, калі Фінляндыя вытрымала поўнамаштабнае савецкае ўварванне. Падраздзяленні, якія атакавалі Фінляндыю з усходу, не былі гатовы да баёў у халодных умовах. Таму іх самым вялікім ворагам стала замярзанне”, - сказаў ён.

На вайсковай базе ў лясах Кіелінупу, у самым сэрцы Лапландыі, дзе войскі NATO трэніруюцца выжываць у суровых прыродных умовах, ключом да выжывання з'яўляецца заставацца сухім. "Старыя метады працуюць лепш за ўсё", – адзначыў Таскінэн. Адным з такіх метадаў з'яўляецца тое, што агнястрэльная зброя не павінна награвацца: яе трэба трымаць увесь час замарожанай. Са слоў камандзіра, “калі вы занесяце яе ўнутр, увесь снег і лёд растане і патрапіць у рулю, а калі вы выйдзеце на двор, яна зноў змерзне. Пакіньце яе на дварэ ці ў намёце, дзе холадна”. Таксама важныя простыя парады, як напрыклад, пакласці газету пад шкарпэткі ў чаравіках, каб "забраць вільгаць з вашых ног", а таксама пастаянная змена пластоў адзення.

Скандынаўская прырода, з яе жорсткімі ўмовамі, не мае аналагаў для большасці вайскоўцаў NATO. Аднак зараз, калі Фінляндыя стала чальцом альянсу, брытанскія, амерыканскія, французскія і швэдскія салдаты асвойваюць спецыялізаваныя навыкі для абароны яе ледзяной мяжы. "Лясныя баі - гэта наша спецыялізацыя", - сказаў Таскінэн. “Я аддаю перавагу лесу. Бранятэхніцы цяжка рухацца праз гэтыя лясы, таму нам прасцей ваяваць. І яшчэ, у лясах зямля няроўная, тут шмат узгоркаў і скал, што дае нам натуральнае прыкрыццё. Мы навучаем пяхоту перасоўвацца па гэтых лясах на лыжах і снегаходах, каб яны маглі хутка перамяшчацца”.

Сярод соцень брытанскіх салдат, якія атрымлівалі навучанне ад фінаў, быў сяржант сувязі Іэн Блумфілд з 4/73 батарэі 5 Каралеўскай артылерыі, якая спецыялізуецца на выведцы і таемным назіранні. Падраздзяленне ажыццяўляе патрулі з чатырох-шасці чалавек на лінію фронту і глыбока ў тыле ворага ўночы, выкарыстоўваючы акуляры начнога бачання. Іх задача - адсочваць мэты і перадаваць выведвальныя звесткі камандзірам, якія каардынуюць удары артылерыі або беспілотнікаў. “Большасць батарэй робяць тое ж самае, але мы спецыялізуемся на выкананні гэтай працы ў глыбокім тыле ворага. Яны пранікаюць няўзнак, асталёўваюць наглядальны пункт, застаюцца гэтулькі, колькі трэба, а затым адыходзяць”, - кажа Блумфілд.

Каб заставацца незаўважанымі, яны рухаюцца ўночы, пад покрывам цемры, улічваючы мясцовасць, кажа вайсковец.

“Яны ўмеюць вельмі добра хаваць свае сляды - рэшткі, якія могуць выдаць іх знаходжанне. На снезе гэта вельмі цяжка зрабіць”. Блумфілд распавёў, што яго падраздзяленне абменьвалася досведам з фінскімі калегамі, якіх ён назваў “спецыялістамі ў халодным надвор'і”:

“Гэта іх асяроддзе, яны прызвычаіліся да такіх варункаў. Калі стаяць на месцы больш за гадзіну... гэта зусім іншы холад. Мінус 2°C, мінус 3°C, як ва Уэльсе, - гэта не тое ж самае, што мінус 2°C ці 3°C тут. Тут цябе марозіць да касцей».

Узброеным сілам NATO прыйшлося вучыцца функцыянаваць без стандартных інструментаў, такіх як GPS, якія не заўсёды працуюць у гэтых умовах. Звычайна салдаты выкарыстоўваюць компасы як рэзервовыя прылады, але і яны не заўсёды эфектыўныя праз натуральнае жалеза ў зямлі, якое замінае магнітам.

Затое фінскія сілы вучылі салдат арыентавацца ў лесе, выкарыстоўваючы толькі прыродныя арыенціры.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]