У Расеі мігрантаў з Азіі, якія патрапілі ў калоніі, прымушаюць ехаць на вайну супраць Украіны

Усплылі падрабязнасці.

Расея працягвае вербаваць на вайну супраць Украіны зняволеных у расейскіх турмах і калоніях. Пры гэтым на фронт забіраюць не толькі грамадзян РФ, але і выхадцаў з краін Цэнтральнай Азіі ды іншых замежнікаў.

Зняволеных масава прымушаюць падпісваць кантракт і ехаць на вайну з Украінай. Пры гэтым надзвычай ціснуць супрацоўнікі калоній на маладых людзей, у якіх неўзабаве заканчваецца тэрмін. Пра гэта паведамляе выданне "Настоящее время".

Ураджэнец Таджыкістана, які адбывае тэрмін у расейскай турме, расказаў, што яго прысудзілі да 7 гадоў пазбаўлення волі, з гэтага тэрміну засталося адбываць усяго толькі 7 месяцаў. Паводле ягоных слоў, зняволеныя з Таджыкістана і Узбекістана, якія адбываюць з ім пакаранне ў калоніі строгага рэжыму недалёка ад Масквы, знаходзяцца ў крытычнай сітуацыі. Кіраўніцтва калоніі стварае для іх невыносныя ўмовы, каб схіліць да падпісання кантракта і адпраўкі на фронт.

Мужчына зазначыў, што асуджаных іншаземцаў прымушаюць адмовіцца ад грамадзянства іх краіны і падаць на грамадзянства Расеі адначасова з укладаннем кантракта на службу ў войску. У выпадку адмовы, зняволеных змяшчаюць у штрафны ізалятар.

“Людзі не ведаюць, што рабіць. Кажуць, звядзём рахункі з жыццём, але не адмовімся ад грамадзянства і не паедзем на вайну. Яны думаюць, што лепш пайсці на суіцыд, чым адвярнуцца ад радзімы і ісці ваяваць”, - сказаў мігрант.

Група зняволеных мігрантаў з калоніі строгага рэжыму недалёка ад Масквы, сцвярджаюць, што ў папраўчай установе ўтрымліваюцца прыкладна 400 зняволеных з грамадзянствам Узбекістана і Таджыкістана. Адміністрацыя турмы абыходзіцца з імі груба, абражае іх паводле рэлігійнай прыкметы. Таксама яны заклікаюць астатніх зэкаў з грамадзянствам Расеі збіваць зняволеных-мігрантаў.

Іншаземцы таксама расказалі, што турэмную форму, якую выдае калонія, наглядчыкі адбіраюць у зняволеных і спальваюць, каб зрабіць знаходжанне людзей у турме невыносным. Пры гэтым у турмах распаўсюджваюцца чуткі, што тыя, хто пайшлі на вайну, гінуць на другі і трэці дзень.

“Яны кажуць, што каго хочуць, таго і пашлюць на вайну. Прапануюць ісці туды са сваёй ініцыятывы: у гэтым выпадку, гавораць, трапіце ў лепшыя месцы. А калі адправяць прымусова, то накіруюць наўпрост на перадавую, дзе ніякіх шанцаў выжыць няма”, - пішуць мігранты.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]