Украінскае войска пачало штурм Новапракопаўкі

УСУ паглыбілі прарыў у Запарожскай вобласці.

Украінскія войскі ўсё глыбей заходзяць у Запарожскую вобласць і штурмуюць Новапракопаўку - прыфрантавое сяло за 1,5 км на поўдзень ад Рабоціна.

Пра гэта гаворыцца ў справаздачы Інстытута вывучэння вайны (ISW).

Паводле інфармацыі вайсковых аналітыкаў, на відэа з геалакацыяй, апублікаваным 23 верасня, відаць, як вайскоўцы расейскага 70-га палка (42 мотастралковая дывізія, 58 агульнавайсковая армія, Паўднёвая вайсковая акруга) уладкоўваюць засаду і забіваюць двух украінскіх пяхотнікаў на паўночна-ўсходняй ускраіне Новапракопаўкі, што паказвае на тое, што ўкраінскія сілы, магчыма, ачысцілі расейскія пазіцыі паміж Рабоціным і Новапракопаўкай.

Акрамя гэтага, шматлікія расейскія крыніцы паведамілі, што 22 верасня расейскія войскі адбілі ўкраінскую атаку на паўночную Новапракопаўку. Гэта першы пацверджаны ўкраінскі наземны напад у непасрэднай блізкасці ад Новапракопаўкі.

Таксама ISW адзначыў, што ўкраінскія войскі не пераадолелі ўсе расейскія абарончыя пазіцыі паблізу Вярбовага. Хуткасць прасоўвання ўкраінскіх войскаў у раёне прарыву застаецца невядомай.

«Расейскія войскі, імаверна, усё яшчэ кантралююць сегменты доўгай траншэі расейскіх баявых пазіцый паміж Рабоціным (10 км на поўдзень ад Арэхава) і Вярбовым, асабліва паблізу тактычнай вышыні на поўдні. Паведамляецца, што расейскія сілы ўсталявалі падрыхтаваныя баявыя пазіцыі амаль у кожнай лесапасадцы, праз якія ўкраінская пяхота павольна і сістэматычна прабіваецца. Расейскія войскі маюць больш палявых умацаванняў за Вярбовым; на поўнач ад Ачаратаватага (26 км на паўднёвы ўсход ад Арэхава), напрыклад, ёсць больш супрацьтанкавых акопаў і баявых пазіцый. Аднак незразумела, наколькі гэтыя пазіцыі ўкамплектаваныя», - гаворыцца ў справаздачы.