«Нам сталі адмаўляць у рэгістрацыі»: сем чалавек не патрапілі на рэйс Кутаісі-Менск

Ім давялося цягнуць жэрабя проста ў аэрапорце.

Сёння ўночы ў рэдакцыю «Онлайнера» напісалі ўсхваляваныя чытачы. Высветлілася, што сем чалавек не змаглі прайсці рэгістрацыю на рэйс Кутаісі-Менск, які вылятаў а 4:55 раніцы. Людзям прапанавалі вярнуцца дадому іншымі рэйсамі. Пасажыры самі размяркоўвалі даты — цягнулі жэрабя проста ў аэрапорце.

Пра сітуацыю расказвае Яўгенія — яна адпачывала ў Грузіі праз бюро. Прыехала на рэгістрацыю на часе, але стаяла ў чарзе адной з апошніх.

- Гэта быў начны рэйс. Мне і яшчэ шасці пасажырам адмовілі ў рэгістрацыі і папрасілі падысці да прадстаўніка "Белавіі" ў аэрапорце. Там нам паведамілі, што здарыўся "перапродаж", месцаў не выстарчыла, таму нам прапанавалі вылет іншымі рэйсамі. 23 верасня з Батумі — два чалавекі і з Тбілісі — адзін, 24 верасня — з Тбілісі чатыры чалавекі. Мы самі размеркавалі, хто і калі паляціць — на паперках напісалі места вылету і выцягвалі жэрабя. Калі спыталі прадстаўніка аб трансферы і пражыванні, нам нічым не змаглі дапамагчы. Нам сказалі: разбірайцеся самі, а ў Менску атрымаеце кампенсацыю.

Яўгенія даслаў відэа з аэрапорта, якое пацвярджае ейныя словы. Работніца ветліва размаўляе з пасажырамі, але спасылаецца на тое, што ліст з інфармацыяй ёй даслалі занадта позна — за пяць гадзін да вылету. Вось чаму людзям не змаглі дапамагчы з гатэлямі.

Чытачы сфатаграфавалі ліст, які атрымалі прадстаўнікі "Белавіі" ў Кутаісі

Са слоў Яўгеніі, сённяшнюю ноч яна правяла з іншымі пасажырамі ў аэрапорце, а цяпер яна і яшчэ тры чалавекі едуць у Тбілісі. Раніцай з беларускай звязаўся прадстаўнік турфірмы і запэўніў, што "Белавія" бясплатна размесціць турыстаў у самавітым гатэлі.

- Асабіста мне зараз дапамагае тураператар, бо я адпачывала арганізавана. Але сярод нас ёсць хлопцы, якія куплялі білеты самастойна. У людзей была паніка, — кажа Яўгенія.

Пасля 15:00 стала вядома, што чатырох знятых з рэйса пасажыраў сустрэлі ў Тбілісі прадстаўнікі "Белавіі". Людзям аплацяць трансфэр і пражыванне ў гатэлі.

- З астатнімі хлопцамі таксама звязаліся прадстаўнікі грузінскай стараны. Яны індывідуальна дамаўляліся з кожным удзельнікам, — адзначае беларуска.

Што кажуць у авіякампаніі?

У прэсавай службе "Белавія" растлумачылі, што на рэйсе Кутаісі-Менск 22 верасня сем пасажыраў не змаглі прайсці рэгістрацыю праз тэхнічную хібу. Іхняя рэзэрвацыя была некарэктна адлюстраваная ў інфармацыйнай сістэме.

- У прадстаўніцтве «Белавіі» ў Грузіі пасажырам прапанавалі скарыстацца іншымі рэйсамі авіякампаніі. Пастанавілі, што пяцёра з іх адправяцца ў Беларусь з аэрапорта Тбілісі, яшчэ двое — з Батумі ў найбліжэйшыя дні. Пры гэтым у чацвярых пасажыраў, якія вылятаюць з Тбілісі, узнікла неабходнасць у наданні жылля. Іх рассялілі ў гатэлі і забяспечылі харчаваннем.