Пад ударамі УСУ войскі РФ пачалі адыходзіць на Мелітопальскім кірунку

Змяненне лініі фронту паказалі на картах.

Сілы абароны Украіны працягваюць выцясняць расейскія войскі і вызваляць акупаваныя землі на поўдні. Узброеныя сілы праводзяць актыўныя наступальныя дзеянні на Мелітопальскім кірунку, нішчачы ворага, прымушаючы адыходзіць ад займаных пазіцый.

Пра гэта паведаміў прадстаўнік Генеральнага штаба УСУ Андрэй Кавалёў, паведамляе Military Media Center. Таксама ўкраінскія байцы працягваюць атакі ў раёне паўднёвей ад Бахмута, наносяць ворагу страты і замацоўваюцца на дасягнутых рубяжах.

Адначасова былі адбітыя напады супраціўніка ў раёне паўночна-ўсходней Грыгароўкі. Расейскія войскі таксама спрабавалі аднавіць сваё страчанае становішча ў раёне Андрэеўкі, аднак не мелі поспеху.

Нагадаем, што Узброеныя сілы Украіны прарваліся праз галоўную лінію абароны РФ у раёне Рабацінага. Цяпер там ідуць вельмі цяжкія баі. Як паведамляе Wall Street Journal, украінская бранятэхніка змагла ўпершыню за час контрнаступлення прарвацца праз асноўную лінію абароны войска РФ каля населенага пункта Вярбавое.