У Польшчы адкрылі завод для вытворчасці HIMARS

Lockheed Martin адкрыў другі ў велічыні вытворчы цэнтр у свеце.

Амерыканскі ваенна-прамысловы канцэрн Lockheed Martin пашырыў сваю прысутнасць у Польшчы, адкрыўшы другі ў велічыні вытворчы цэнтр у свеце. Пра гэта паведаміў віцэ-прэзідэнт кампаніі ў Еўропе Джонатан Хойл.

«Належны нам завод у Мельцы з'яўляецца другім у велічыні вытворчым цэнтрам Lockheed Martin у свеце. Адзіным буйнейшым заводам застаецца наша вытворчасць у Грынвіле ў ЗША», – расказаў Хойл. Гэты крок з'яўляецца часткай стратэгіі дыверсіфікацыі вытворчасці Lockheed Martin.

Як адзначае Джонатан Хойл, гэтая стратэгія ўжо прынесла вынікі, дазволіўшы падвоіць вытворчасць рэактыўных сістэмаў залпавага агню HIMARS і пераносных супрацьтанкавых ракетных комплексаў Javelin. Гэты захад абумоўлены не толькі «зменамі ў геапалітычнай абстаноўцы», сцвярджае прадстаўнік Lockheed Martin. За час пандэміі кампанія ўразумела, што цэнтралізацыя вытворчасці ў адным месцы вынікуе высокія рызыкі.

Намеснік кіраўніка Lockheed Martin таксама падкрэсліў, што кампанія імкнецца да далейшага развіцця сваёй дзейнасці ў Польшчы і знаходзіцца ў перамовах з польскім Міністэрствам абароны пра магчымае супрацоўніцтва на розных узроўнях. Падрабязнасці пагадненняў не раскрываюцца.

З пачатку вайны ва Украіне заходнія вытворцы зброі і ваеннай тэхнікі задумаліся пра адкрыццё новых вытворчых магутнасцяў у Еўропе. Некаторыя з іх пачалі вырабляць сваю прадукцыю непасрэдна ва Украіне. Так, у жніўні нямецкі зброевы канцэрн Rheinmetall пастанавіў арандаваць танкавыя заводы ва Украіне, каб абслугоўваць і вырабляць танкі Leopard. Яшчэ адзін завод на захадзе Украіны канцэрн павінен адкрыць з нуля. На прадпрыемстве будуць збіраць паводле ліцэнзіі і рамантаваць бронетранспарцёры Fuchs. У ліпені турэцкая кампанія Baykar пачала будаўніцтва завода для вытворчасці ўдарных беспілотнікаў Bayraktar. У канцы жніўня брытанская кампанія BAE Systems адкрыла офіс ва Украіне для рэалізацыі супольных праектаў вытворчасці зброі. На старце тут плануюць выпускаць і рамантаваць гаўбіцы L119 стандарту NATO.