У Міжземным моры археолагі знайшлі свой «бермудскі трыкутнік»

Знойдзеныя патанулыя судны.

Падчас каардынавана ЮНЭСКА экспедыцыі на водмель Скеркі міжнародная група даследчыкаў выявіла тры караблі, якія патанулі ў розны час ля рыфа Кіф, піша New Voice.

Група марскіх археолагаў з Алжыра, Харватыі, Егіпта, Францыі, Італіі, Марока, Гішпаніі і Туніса правяла супольную місію і выявіла тры патанулыя судны. Адно з іх патанула паміж 100 і 200 годам нашай эры, а два іншых датуюцца пачаткам ХХ стагоддзя. Даследчыкі прэзентавалі свае вынікі сёння на прэс-канферэнцыі ў штаб-кватэры ЮНЭСКА ў Парыжы.

З дапамогай шматпрамянёвага гідралакатара і дыстанцыйна кіраваных падводных апаратаў (ROV) археолагі склалі мапу марскога дна і выявілі адломкі патанулых суднаў. Асабліва пільна яны вывучалі кантынентальны шэльф Туніса і Сіцыліі ў рамках асобных праектаў, якія ўзначальваюцца Тунісам і Італіяй адпаведна.

Нядаўна выяўленыя абломкі караблёў, якія знаходзяцца побач з рыфам Кіф, прызнаны небяспечнай вобласцю на мелі Скеркі. Гэты рыф знаходзіцца паміж Сіцыліяй на поўначы і Тунісам на паўднёвым захадзе. Кіф займае вялізную плошчу Міжземнага мора, што стварае цяжкасці для навігацыі суднаў нават у нашы дні.

Асаблівую небяспеку ён нясе таму, што знаходзіцца на папулярным са старажытнасці гандлёвым маршруце.