СМІ: Афіцэраў ГРУ, якія ўзначальвалі офісы «Аэрафлота» па ўсім свеце, кінулі на вайну

Траціну прадстаўніцтваў кампаніі за мяжой узначальвалі кадравыя афіцэры ГРУ.

Прадстаўніцтвы найбуйнейшай расейскай авіякампаніі «Аэрафлот» ва ўсім свеце ўзначальвалі прадстаўнікі ГРУ і КДБ. Журналісты The Insider распавялі, што пасля пачатку вялікай вайны частку з гэтых «прадстаўнікоў» адправілі назад у Расею і кінулі на вайну супраць Украіны.

У матэрыяле адзначаецца, што дзясяткі афіцэраў Першай галоўнай управы КДБ і ГРУ шпіёнілі пад «Аэрафлотам» яшчэ пры СССР. У асноўным, піша Insider, яны займалі пасады прадстаўнікоў за мяжой, пілотаў, бортмеханікаў і сцюардэс.

Са звестак журналістаў, да пачатку поўнамаштабнай вайны супраць Украіны траціну прадстаўніцтваў «Аэрафлота» за мяжой узначальвалі кадравыя афіцэры ГРУ. Заробак гэтыя «прадстаўнікі» атрымлівалі ад ГРУ, а офісы, жыллё і транспартныя выдаткі ім плаціла авіякампанія.

Да прыкладу, офіс «Аэрафлота» ў Вене ўзначальваў Вадзім Каламыйчанка, які да гэтага пад выглядам супрацоўніка авіякампаніі шпіёніў у Дэлі і Венецыі, здабываючы сакрэты, звязаныя з вайсковай авіяцыяй.

Пасля таго як ЕЗ закрыў неба для расейскіх самалётаў, Каламыйчанка быў вымушаны вярнуцца ў Расею.

Са слоў крыніцы The Insider у вайсковай разведцы, цяпер «Каламыйчанку перакінулі на ўкраінскі кірунак, але ён яшчэ не зусім акліматызаваўся пасля Еўропы і сноўдае дарма».

Офіс «Аэрафлота» ў Шанхаі ўзначальваў Сяргей Салаў, а ў Ганконгу - Максім Грэхаў.

Першы, са звестак журналістаў, вучыўся ў Кітаі ў вайскова-дыпламатычнай акадэміі, а другі - служыў у ГРУ ў марской пяхоце УС РФ.

У сакавіку 2022 года брыгада разам з іншымі акупантамі ўварвалася ва Украіну і вызначылася ў Гастомелі і Вуглядары. У баях яны страцілі больш за 30 чалавек забітымі і мноства баявой тэхнікі. Цяпер Грэхаў і Салаў знаходзяцца ў рэзерве.

Офісам у Дубаі кіруе Віталь Агурцоў. Крыніца The Insider у Дубаі паведаміла, што пасля пачатку поўнамаштабнай вайны «Агурцоў круціцца як вавёрка ў коле, паколькі акрамя аператыўных задач яму даручылі надаваць дапамогу расейскім абаронным прадпрыемствам у абыходзе санкцый».