У Наваполацку затрымалі вядомых у горадзе рок-музыкаў
- 9.06.2023, 15:11
- 6,160
«Хапун» арганізавалі напярэдадні фестывалю.
У Наваполацку 6 чэрвеня былі затрыманыя два рок-музыкі: вакаліст гурта Detroit Hills Аляксей Запаснік і бас-гітарыст гурта BTTF Арцём Новікаў, паведамляе праваабарончы цэнтр «Вясна».
Аляксей Запаснік - вакаліст гурта Detroit Hills, Арцём Новікаў - бас-гітарыст гурта BTTF. Музыкі добра знаёмыя, Запаснік спяваў і ў BTTF, прынамсі летась ён быў на афішы аднаго з канцэртаў як удзельнік гурта.
Паводле папярэдняй інфармацыі, абодвух затрымалі паводле адміністрацыйнага артыкула, у чым іх абвінавацілі і які тэрмін арышту прызначылі, невядома.
У той жа час іншы наваполацкі музыка, бубнач гурта ParanoiaDolls Зміцер Шалак выйшаў на волю пасля адміністрацыйнага арышту.
Усе пералічаныя калектывы, як сцвярджаюць праваабаронцы, павінны былі выступіць на оўпэн-эйры піўнога фестывалю Indy City Fest у Наваполацку, які адбудзецца ў суботу, 10 чэрвеня.
Цяпер у афішы канцэрта Detroit Hills, BTTF і ParanoiaDolls адсутнічаюць, а поўны спіс гуртоў арганізатары раней не публікавалі.
Дарэчы, у жніўні мінулага года іншага музыканта Detroit Hills, гітарыста Захара Сабіна, затрымлівалі за рэпост «экстрэмісцкіх матэрыялаў». Маладзён ужо з'ехаў з краіны.
Нагадаем, у канцы траўня ў Менску затрымалі трох удзельнікаў гурта faceOFF. Суд арыштаваў іх на 13 і 15 дзён. Чатыры песні гурта прызналі «экстрэмісцкімі».
