Грэта Тунбэрг запатрабавала пакараць Расею за падрыў Кахоўскай ГЭС

Крэмль учыніў экацыд ва Украіне.

Знішчыўшы дамбу Кахоўскай ГЭС, Расея пацягнула за сабой экацыд, завошта абавязкова мае быць пакараная.

Пра гэта на сваёй старонцы ў сетцы Твітэр напісала швэдская эка-актывістка Грэта Тунбэрг.

«Гэты экацыд – працяг неапраўданага поўнамаштабнага ўварвання Расеі ва Украіну. Гэта - яшчэ адно злачынства, якое адабрала ў свету мову. Нашы погляды зноў прыкаваныя да Расеі, якая мае быць прыцягнутая да адказнасці за свае злачынствы», - напісала Тунбэрг.

Як паведамляў сайт Charter97.org, раніцай 6 чэрвеня стала вядома, што расейскія акупанты падарвалі Кахаўскую ГЭС. У выніку выбуху цалкам разбураная машынная зала, станцыя не падлягае аднаўленню.

У рэгіёне распачатая эвакуацыя. Затапіць можа 80 паселішчаў. Агулам у крытычнай зоне на правым беразе Дняпра знаходзяцца 16 тысяч чалавек.

Падрыў Кахоўскай ГЭС пагражае часова акупаванай Запарожскай атамнай станцыі, аднак сітуацыя цяпер пад кантролем. Таксама падрыў можа выклікаць дысбаланс у энэргасістэме Украіны. Палеткі на поўдні Украіны могуць ператварыцца ў пустэльню.

Паводле звестак украінскай выведкі, ніхто акрамя Расеі не меў тэхнічнай магчымасці ўзарваць ГЭС. Выданне NYT апытала экспертаў і таксама прыйшло да высновы, што станцыю ўзарвалі знутры. у тэлеграм-канале 205-Й мотастралковай брыгады РФ, якая падазраецца ў падрыве дамбы, аб заміноўванні ГЭС і магчымасці падрыву пісалі яшчэ ў кастрычніку 2022 года.