У Шклоўскім раёне вясковец абліў жанчыну бензінам і падпаліў

За жыццё пацярпелай змагаюцца медыкі.

Крымінальную справу распачалі ў дачыненні да 52-гадовага жыхара Шклоўскага раёна, які абліў сужыцельку гаручай вадкасцю і падпаліў. Падрабязнасці інцыдэнту расказаў набліжаны да МУС тэлеграм-канал.

24 траўня ў абласную лякарню Магілёва даставілі 62-гадовую жанчыну з апёкамі большай часткі цела. Пацярпелая паспела расказаць медыкам, што траўмы яна атрымала ад свайго сужыцеля.

Высветлілася, што напярэдадні пара пасварылася. Мужчына абліў жанчыну гаручай вадкасцю і падпаліў. Толькі праз некаторы час ён патэлефанаваў у хуткую.

Цяпер за жыццё жанчыны змагаюцца медыкі. На мужчыну пачалі крымінальную справу.