Беспілотнікі масава атакавалі Маскву

Серыя выбухаў грымнула і пад Масквой.

Расейскія СМІ паведамляюць, што ўначы 30 траўня адбыўся выбух у Маскве. Гэта звязваюць з атакай беспілотніка, інфармуе nv.ua.

Выбух адбыўся ў паселішчы Маскоўскім на вуліцы Атласава дом 11 непадалёку ад Унукава. На 25-м паверсе дома выбітая шыба, пажару не было, паведамляе The Moscow Times.

Жыхары дома былі выведзеныя на двор і разгублена хадзілі па ходніку, назіраючы за работай ратавальнікаў і збіраючы абломкі беспілотніка, які быў даволі буйным.

Telegram-канал Mash паведаміў аб нападзе беспілотнікаў на яшчэ адзін будынак у цэнтры Масквы.

«Шматпавярховік на Ленінскім праспекце атакаваны беспілотнікам у Маскве. З папярэдняй інфармацыі, ёсць параненыя», - гаворыцца ў публікацыі.

Са звестак канала, абломкі дрона ўляцелі ў акно адной з кватэр, пасля чаго эвакуавалі блізу 300 чалавек.

МНС паведаміла, што высвятляе прычыны здарэння. Тэлеграм-каналы Baza і Mash пішуць, што ў будынку адбыўся выбух, прычынай мог быць беспілотнік. Жыхары выклалі відэа з прадметамі, падобнымі да абломкаў беспілотніка. SHOT і Mash пішуць, што пашкоджанні атрымала адна з плітаў канструкцыі будынка.

Baza паведамляе аб яшчэ адным беспілотніку, які, папярэдне, урэзаўся ў жылы дом у Маскве на Прафсаюзнай вуліцы. Ён уляцеў у акно кватэры на 16 паверсе. Зараз з дому эвакуююць жыхароў.

Жыхары паказвалі на камеру знойдзены каля дома прадмет, на іх думку, падобны да крыла БПЛА. Гэтую версію пацвердзілі ў паліцыі РФ.

Мэр Масквы Сяргей Сабянін заявіў аб ранішнім нападзе беспілотнікаў на сталіцу РФ:

«Сёння раніцай у выніку атакі БПЛА ў некалькіх будынках адбыліся пашкоджанні. Усе экстраныя службы горада знаходзяцца на месцах здарэнняў. Яны высвятляюць акалічнасці здарэння».

Жыхары Падмаскоўнага Адзінцова паведамляюць аб гуках выбухаў. Больш за дзесяць беспілотнікаў збіты ў Падмаскоўі за сённяшнюю раніцу. Большасць з іх - у Істрынскім, Краснагорскім і Адзінцоўскім раёнах.