Польшча закрывае мяжу для беларускіх грузавікоў

Мяжа закрыецца і для цяжкавікоў з расейскімі нумарамі.

Міністэрства ўнутраных спраў і адміністрацыі Польшчы плануе прыпыніць да далейшага апавяшчэння грузавыя перавозкі з Беларуссю для грузавікоў, зарэгістраваных у Расеі ці Беларусі.

Пра гэта паведамляе businessinsider.com.pl са спасылкай на праект паправак да распараджэння міністра ўнутраных спраў і адміністрацыі аб часовым прыпыненні або абмежаванні памежнага руху ў пэўных пунктах перасячэння мяжы. Праект, размешчаны на сайце Цэнтра ўрадавага заканадаўства (RCL), прайшоў міжведамасныя кансультацыі.

«Беручы пад увагу неабходнасць гарантавання грамадскай бяспекі, у сувязі з артыкулам 7 Пагаднення паміж Урадам Рэспублікі Польшча і Урадам Рэспублікі Беларусь аб памежных пераходах (…), неабходна як мага хутчэй прыпыніць грузавы прымежны рух у пунктах пропуску на мяжы з Рэспублікай Беларусь для грузавых аўтамабіляў, сядзельных цягачоў, прычэпаў, уключаючы паўпрычэпы, і саставаў транспартных сродкаў, зарэгістраваных на тэрыторыі Рэспублікі Беларусь і Расейскай Федэрацыі», – гаворыцца ў лісце, які накіроўвае гэты праект для кансультацый.

Згодна з праектам, раздзелы павінны набыць моц на наступны дзень пасля даты публікацыі.