Беларусь амаль у 300 разоў павялічыла ўвоз смартфонаў з Казахстана

Таксама вязуць кампутары і ноўтбукі.

З пачатку года з Казахстана ў Беларусь увезлі значна больш смартфонаў, кампутараў і ноўтбукаў, а таксама хлеба. Аб гэтым паведамляе LS са спасылкай на звесткі нацыянальнай статыстыкі.

За першы квартал 2023 года імпарт з Казахстана ў Беларусь упаў амаль у 16 разоў у параўнанні з аналагічным перыядам мінулага года. Пры гэтым пералік казахскіх тавараў, увезеных у нашу краіну, істотна змяніўся. У ім з'явіліся новыя пазіцыі: легкавікі (84 штукі), аўтапагрузчыкі, водныя помпы, шарыкавыя і ролікавыя падшыпнікі.

Адчувальна вырас імпарт смартфонаў і тэлефонаў з Казахстана - у 286 разоў (152 тысячы), хлебабулачных вырабаў - амаль у 100 разоў, кампутараў і ноўтбукаў - амаль у дваццаць разоў.

А вось экспарт з Беларусі ў Казахстан, наадварот, стаў большы - на 18,3%. Пры гэтым амаль у 133 разы павялічыліся пастаўкі пруткоў з жалеза, у 2,6 раза - дрэва і вырабаў з яго, на 62% - сыроў і тварагу і на 35,3% - каўбас.

Таксама наша краіна паставіла ў Казахстан амаль у 5 разоў больш, чым за першы квартал мінулага года, газона- і сенакасілак, на 27,7 адсоткаў больш трактароў і на 84,5 адсотка больш пластмас і вырабаў з іх. Затое экспарт беларускай мэблі ўпаў на 82,1%, ялавічыны - на 28,3%.