Міжнародныя праваабаронцы пачынаюць кампанію ў падтрымку Мікалая Статкевіча

Вы можаце падтрымаць лідара беларускай апазіцыі.

З сярэдзіны лютага сваякам палітвязня і лідара беларускай апазіцыі Мікалая Статкевіча нічога не вядома пра ягоны лёс. Гэта выклікае сур'ёзныя асцярогі ў нямецка-швейцарскага праваабарончага цэнтра Libereco. Міжнародныя праваабаронцы пачынаюць кампанію ў падтрымку палітвязня.

«Мы заклікаем беларускі рэжым і адміністрацыю турмы:

- неадкладна дазволіць Мікалаю Статкевічу кантакт з сям'ёй, а таксама неадкладна спыніць усе рэпрэсіі і пакаранні ў дачыненні да яго, забяспечыць яму сувязь з вонкавым светам;

- надаць медыцынскую дапамогу пры неабходнасці;

- неадкладна вызваліць Мікалая Статкевіча і ўсіх палітвязняў Беларусі.

Libereco запускае кампанію рассылкі лістоў. Мы хочам паказаць беларускім уладам, што за імі пільна сочаць на міжнародным узроўні», - паведамілі праваабаронцы.

Праваабаронцы пачынаюць кампанію рассылкі лістоў да 1 траўня, Міжнароднага дня працоўнага руху.

«Напішыце ліст палітвязню і пакажыце кіраўніцтву турмы, што мноства людзей падтрымліваюць і думаюць пра Мікалая!» - заклікае Libereco.

Як напісаць ліст?

Адрас для лістоў: Мікола Статкевіч, ПК №13 вул. Савецкая 205, Індэкс: 211791. Глыбокае, Рэспубліка Беларусь.

Адпраўце ліст праз пошту Мікалаю і ў Libereco у фармаце PDF. На жаль, адміністрацыя турмы можа не перадаць ліст да адрасата. Гэта магчыма. Праваабаронцы будуць удзячныя, калі вы адправіце ім копію вашага ліста (email: belarus@libereco.org).

«Мы адправім усе лісты да сям'і Мікалая Статкевіча. Яны змогуць распавесці яму аб вашых лістах пры сустрэчы», - тлумачыць Libereco.

Вы таксама можаце сфатаграфаваць сваю паштоўку ці ліст Мікалаю Статкевічу і падзяліцца ў Facebook, Instagram ці Twitter: выкарыстоўвайце хэштэгі #WeStandBYyou і #FreeMikalai і адзначце @LiberecoPHR.

Нагадаем, лідар беларускай апазіцыі знаходзіцца ў інфармацыйнай блакадзе амаль 80 дзён. Ад Мікалая Статкевіча не прыходзяць лісты, да яго не пускаюць адвакатаў.

Мікола Статкевіч быў асуджаны на 14 гадоў пазбаўлення волі, яго абвінавацілі ў «арганізацыі масавых беспарадкаў» (арт. 293 Крымінальнага кодэкса Беларусі).

З пачатку ліпеня 2022 года - з таго часу, як Мікалай Статкевіч пачаў адбываць пакаранне ў Глыбоцкай калоніі - у яго было 23 спагнанні. Як мінімум 9 разоў ён трапляў у штрафны ізалятар - на тэрміны ад 7 да 10 дзён. Новы год палітвязень сустрэў у штрафным ізалятары.

Мікалай Статкевіч утрымліваецца ў калоніі ў максімальна жорсткіх умовах: палітыка трымаюць у адзіночнай камеры ў небяспечных для здароўя ўмовах. Стала вядома, што ў зняволенні Мікола Статкевіч двойчы перахварэў на COVID-19.