Беларус павінен кампенсаваць прадпрыемству 59 тысячаў рублёў за «нядбайнае» стаўленне да працы

Яму давядзецца амаль тры гады працаваць бясплатна.

Сярэдні заробак у Беларусі за люты склаў 1,7 тыс. рублёў. Калі герой нашага тэксту атрымлівае хоць бы столькі, то яму давядзецца амаль тры гады працаваць бясплатна, піша «Анлайнер».

Гісторыя з Чавускага раёна. Былы дырэктар прадпрыемства «Сасновы бор г. Чавусы» з імем Г. павінен пакрыць 59 тыс. шкоды, прычыненай нядбайным стаўленнем да працы. Займаючы пасаду кіраўніка, мужчына дапусціў падзеж 117 галоваў буйной рагатай жывёлы на ферме ў аграгарадку Ваўковічы.

Што значыць нядбайна ставіўся да працы? Адказ можна знайсці ў паведамленні Генпракуратуры:

«Ён не прыняў неабходных захадаў:

для нарыхтоўкі і набыцця дастатковай колькасці кармоў для БРЖ,

укамплектавання пасады галоўнага ветэрынарнага лекара прадпрыемства (пасада была вакантная больш за 2 гады),

лячэння і абследавання жывёлаў,

а таксама вызначэння прычынаў іх падзяжу.

Акрамя таго, адказчык як дырэктар не пракантраляваў дакладнасць звестак, якія ўносілі загадчыкі малочнатаварных фермаў і комплексу ў справаздачы аб руху жывёлы і птушкі за студзень – люты 2021 года, што не дазволіла своечасова выявіць непрадукцыйнае выбыццё буйной рагатай жывёлы і ўжыць захады для яго прадухілення ў далейшай працы жывёлагадоўчых падраздзяленняў прадпрыемства».

Пастанову аб неабходнасці спагнаць з Г. на карысць ААТ «Сасновы бор г. Чавусы» 59 тыс. рублёў прыняў суд Чавускага раёна. Яна яшчэ не набыла законнай моцы, яе можна абскардзіць і апратэставаць.