У Беларусі затрымалі былога памочніка пракурора раёна

Ён нібыта фатаграфаваў дом аднаго з лукашыстаў.

У Беларусі затрымалі былога памочніка пракурора Глускага раёну, паведамляе “Наша Ніва”.

Яму выстаўляюць прэтэнзію, што ён нібыта перадаў звесткі сілавікоў і сфатаграфаваў дом аднаго з іх.

Кастусю Прытуленку 43 гады, і ён з Глуска. Дзе ён працуе зараз – невядома, але яшчэ пару гадоў таму ён дакладна працаваў у сілавых структурах.

Мужчына скончыў Беларускі інстытут правазнаўства, які зараз перайменавалі ва ўніверсітэт права і сацыяльна-інфармацыйных тэхналогій. Кар'еру пачынаў у пракуратуры Глускага раёна. У 2005 годзе ён быў следчым, а праз некалькі гадоў стаў памочнікам пракурора Глускага раёна.

У мужчыны ёсць непаўналетнія дзеці.

Сёння з'явілася відэа затрымання мужчыны. Ён кажа, што нібыта перадаў каналу “Чорная кніга Беларусі” звесткі некалькі сілавікоў і сфатаграфаваў дом аднаго з іх. Мяркуючы з паведамлення ГУБАЗіК, супраць мужчыны можа быць заведзеная крымінальная справа.