СМІ: Пуцін змяніў месца жыхарства праз параною і стрэс

Кіраўнік РФ пераехаў у больш ахоўную «цытадэль».

Расейскі дыктатар Уладзімір Пуцін пераехаў жыць у Крэмль праз параною і стрэс, выкліканы вайной Расеі супраць Украіны, піша брытанскі таблоід The Mirror.

Журналісты заявілі, што Пуцін «кінуў сваю палюбоўніцу-гімнастку, 39-гадовую Аліну Кабаеву, і іх маленькіх дзяцей, каб жыць у самай вядомай цытадэлі Расеі».

Мяркуюць, што дыктатар пераехаў у Крэмль, які добра ахоўваецца, з меркаванняў бяспекі.

Да гэтага часу 70-гадовы Пуцін жыў у сваёй афіцыйнай рэзідэнцыі Нова-Агараве ў Падмаскоўі.

У адным з інтэрв'ю дыктатар прызнаў, што прымаў лідара Кітая Сі Цзіньпіна ў сваёй крамлёўскай кватэры.

«Я тут працую і часта праводжу шмат начэй», - сказаў ён.

Ягоны прэс-сакратар Дзмітрый Пяскоў даў зразумець, што пастанова Пуціна жыць побач са сваім крамлёўскім офісам была наўпрост звязаная з вайной.

«Ён выкарыстоўвае гэтую кватэру, бо ў яго шчыльны працоўны графік», – сказаў Пяскоў.