Рэзнікаў вызначыў тры крытэрыі перамогі Украіны ў вайне супраць РФ

Адзін з іх - аднаўленне межаў 1991 года.

Украіна атрымае канчатковую перамогу над Расеяй, калі будуць адноўленыя межы 1991 года, гарантаваная бяспека ўсіх украінцаў, а расейскія ваенныя злачынцы будуць пакараныя. Аб гэтым міністр абароны Украіны Аляксей Рэзнікаў сказаў у інтэрв'ю Gazeta Wyborcza.

З ягоных слоў, першым крытэрам з'яўляецца аднаўленне межаў 1991 года, уключна з Крымам.

Другой умовай з'яўляецца гарантаванне свабоды і бяспекі, каб кожны ўкраінец мог сесці на рэйс міжнароднага возніка ў Кіеве і паляцець, куды захоча.

Трэці крытэр, паводле Аляксея Рэзнікава, можа заняць больш часу, але для яго, як юрыста, будзе азначаць канчатковую перамогу - гэта будзе пастанова Міжнароднага крымінальнага суда ў Гаазе паводле справы расейскіх ваенных злачынцаў.

«Гэта павінна быць падобна да Нюрнберга. Нюрнберг змяніў нямецкую нацыю. Для таго, каб мы і вы маглі спакойна жыць у нашых краінах з усведамленнем таго, што пагрозы з боку Расеі больш няма або яна зведзеная да мінімуму, павінен быць вердыкт суда. Расея павінна быць асуджаная і павінна пакаяцца - і гэта будзе канчатковая перамога ў гэтай вайне», - дадаў міністр.