У Магілёве студэнты паставілі на месца прапагандыста Азаронка

Студэнты назвалі яго прапагандыстам і абвінавацілі Пуціна ў вайне супраць Украіны.

Прапагандыст Рыгор Азаронак на пару з намеснікам старшыні рэспубліканскага грамадскага аб'яднання «Белая Русь» Андрэем Басаком з'ездзілі на сустрэчу са студэнтамі Беларускага дзяржаўнага ўніверсітэта харчовых і хімічных тэхналогій. Шараговая «палітхвілінка» ператварылася ў гарачую спрэчку, калі студэнты сталі задаваць гасцям «нязручныя пытанні». Рэпартаж аб сустрэчы з прапагандыстам апублікавала газета адміністрацыі Лукашэнкі «СБ».

Супрацоўніца «СБ» Алена Казлоўская ў самым пачатку свайго матэрыялу адзначыла, што адна з удзельніц сустрэчы - студэнтка Дар'я Саітава - навінамі не цікавілася, прозвішчы спікераў ёй не былі вядомыя, а да Азаронка прыйшла толькі для таго, каб не ісці на лекцыю па прадмеце.

«Міні-апытанне, праведзенае Андрэем Басаком у пачатку сустрэчы, засведчыла: пазіцыя многіх студэнтаў сфармаваная шмат у чым дзякуючы «інтэрнету ў шырокім сэнсе слова». У аўдыторыі на 180 месцаў знайшлося ўсяго некалькі чалавек, якія глядзяць тэлевізар, з іх толькі дзве - праграмы навін. Астатнія чэрпаюць інфармацыю «з тэлефона», - адзначыла аўтарка артыкула.

У самым пачатку сустрэчы Рыгор распавёў студэнтам, што інтэрнэт вынайшаў Пентагон, каб выпускаць «не мульцікі ці іншую забаўку, а зброю», а затым перайшоў да сваёй улюбёнай тэмы - «інфармацыйнай вайны».

- Ды напраўду нікому верыць не трэба, у тым ліку і вам, - данеслася з аўдыторыі. - І тут, і там суцэльная прапаганда!

- Тады давайце разбірацца з мэтамі. Дзяржава імкнецца, каб вы спакойна вучыліся, працавалі, стваралі сем'і і адчувалі сябе ў бяспецы. А апаненты дзяржавы чаго хочуць - дэмакратыі, «пераменаў»? А чаго вы хочаце? - Заявіў Азаронак, не патлумачыўшы, што ж дрэннага ў дэмакратыі і пераменах.

Затым размова перайшла да канфлікту ва Украіне. Як адзначыла Алена Казлоўская, «мяркуючы па зместу пытанняў», многія студэнты ўважаюць завадатарам вайны «расейскага прэзідэнта».

- У нас у ВНУ з'явіўся прарэктар па бяспецы, навошта ён нам? - перайшлі на мясцовы ўзровень праблемы студэнты.

- Сёння Беларусь - прыфрантавая дзяржава, - растлумачыў прапагандыст. - І ў вас цяпер ёсць чалавек, на якога ўскладзеная адказнасць за тое, каб з вамі было ўсё ў парадку. Гэта дрэнна? Ці вы не чыталі пра страшныя выпадкі расстрэлаў дзяцей і педагогаў у ЗША, Расеі? Вы ж не хочаце, каб з вамі такое здарылася?

Хтосьці з залі згадаў, што «ў нашай краіне за ўпадабанкі саджаюць».