На мяжы Беларусі з Украінай сфармавалі новы зэнітна-ракетны полк

Туды адпраўляецца Хрэнін.

У Беларусі сфармаваны новы зенітны ракетны полк. Ён размяшчаецца ў Лунінцы, недалёка ад мяжы з Украінай. Пра гэта паведаміла прэс-служба Мінабароны.

Сёння размяшчэнне палка наведае міністр абароны Віктар Хрэнін.

«Пры фармаванні палка асаблівая ўвага надавалася стварэнню сучаснай вайсковай інфраструктуры і вучэбна-матэрыяльнай базы, абсталяванню камфартабельных месцаў размяшчэння асабовага складу, пытаннем сацыяльнага забеспячэння вайскоўцаў і іх сем'яў», — гаворыцца ў паведамленні прэс-службы.

Нагадаем, летась на аэрадроме ў Лунінцы размяшчаліся расейскія авіяпадраздзяленні. У пачатку гэтага года з'яўлялася інфармацыя аб рамонце кашараў у раёне аэрадрома. У студзені 2022 года Аляксандр Лукашэнка наведваў яго. Тады абмяркоўвалася, што трэба зрабіць як у Лунінцы, так і ў Беларусі агулам з сістэмай СПА. За мінулы час Беларусь паспела атрымаць ад РФ ЗРК С-400.