Вайсковы экспэрт: Расея можа рыхтаваць гібрыдную аперацыю супраць Малдовы

Крэмль ужо 21-дзень не наносіць масаваныя ракетныя ўдары па Украіне.

Уласна, з першым днём вясны і 21-м днём без масаваных ракетных удараў. Тры тыдні расейскія акупанты не ажыццяўлялі масаваных ракетных удараў па Украіне і гэта прымушае задумацца над прычынамі іх адсутнасці, бо да 24 лютага боекамплект у расейскіх акупацыйных войскаў (РАВ) быў назапашаны, піша ўкраінскі вайсковы экспэрт Аляксандр Каваленка.

Нагадаю, што сярэдні паказчык назапашвання боекамплекта ракет рознай наменклатуры ў РАВ складае ад 2-3 да 5 ракет на дзень. Гэта значыць, на сёння, 1 сакавіка, у РАВ можа быць назапашаны БК ад 60 да 105 ракет. Дык, уласна, чаму не запусцілі і не запускаюць?

Я не схільны верыць у тое, што ракеты ў расейскіх акупантаў скончыліся. У іх вытворчасць як была, так і ёсць. Так, абмежаваная і не задавальняючая запатрабаванні, але ўсё ж ёсць.

Так, АТ «Доследнае канструктарскае бюро «Наватар» цягам лютага выдавала 1 КРМБ «Калібр» на дзень. У АТ «Карпарацыя тактычнае ракетнае ўзбраенне» (Каралёў, Маскоўская вобл.) у лютым закрыла план на выраб ракет Х-38М і Х-31ПМ, сумарна не менш за 20 адзінак.

Агулам раз на тыдзень праходзіць вытворчасць КР «Онікс», якія адпраўляюцца для 15 АБрбр БРК «Бастыён-П». Тады, што азначае гэтая паўза?

На мой погляд гэтая паўза можа быць выкліканая або назапашваннем максімальна магчымага БК, для нанясення максімальна разбуральнага эфекту з магчымых, або падрыхтоўкай да ўжо іншай «СВА», якую неабходна будзе падтрымаць нанясеннем ракетных удараў.

Калі казаць пра максімальна магчымы ўдар, то тут трэба разумець, што ён таксама мае абмежаванні. Гэтым абмежаваннем з'яўляецца колькасць носьбітаў гэтага БК. Гэта значыць, Расея не можа назапасіць больш, чым здольныя запусціць носьбіты. Або гэта назапашванне для доўгачасовага выкарыстання. І вось тут усплывае варыянт з яшчэ адной «СВА», гібрыднай аперацыяй, напрыклад, супраць Малдовы.

У Малдовы на сёння як такой няма эшаланаванай СПА, якая магла б эфектыўна абараніць паветраную прастору краіны ад масавага пранікнення ракет.

Менавіта наданне падтрымкі надыходзячым падраздзяленням з тэрыторыі Прыднястроўя праз нанясенне сталых ракетных удараў па тэрыторыі Малдовы можа ў перспектыве ўжыць Расея, калі пойдзе на рэалізацыю такога сцэнару.

Як бы гэта дзіўна не гучала, але калі неўзабаве па Украіне так і не будзе масаванага ракетнага ўдару, то гэта азначае - Расея рыхтуецца да аднаго з апісаных вышэй сцэнараў. І ў гэтым выпадку варта напружыцца больш Кішынёву, чым Кіеву.