У Беларусі адбыўся буйны збой у працы сэрвісаў «Яндэкса»

З чым звязаны збой, невядома.

Днём 6 лютага адбыўся маштабны, але кароткачасовы збой у працы сэрвісаў "Яндэкса", які закрануў карыстальнікаў у Беларусі і Расеі. У кампаніі заявілі, што ўжо развязалі праблему.

У панядзелак некаторы час не працавалі "Пошук", "Дыск", "Лаўка", "Музыка", "Карты", "Кінапошук", "Таксі", Uber, калонкі з "Алісай" і іншыя сэрвісы "Яндэкса", "Афіша Daily". Таксама збой узнік у працы платформы блогаў "Дзен", якая належыць VK, паведаміў ТАСС.

Як піша "Гульня" са спасылкай на статыстыку downradar.ru, праблемы пачаліся прыкладна а 17 гадзіне паводле маскоўскага і беларускага часу. Большасць пацярпелых ад збояў у працы сэрвісу знаходзіліся ў расейскіх Маскве, Санкт-Пецярбургу і Цюмені, аднак ёсць у спісе і гарады Беларусі – да прыкладу Менск і Гомель.

З чым звязаны збой, невядома. У "Яндэксе" расказалі, што праблема ўжо развязаная.

– У шэрагу карыстальнікаў узнікалі кароткачасовыя цяжкасці з доступам да сэрвісаў "Яндэкса". На гэты момант усе сэрвісы працуюць у штатным рэжыме, – паведамілі ў кампаніі. Тое самае тычыцца і кантэнтавай платформы "Дзен".

Аднак некаторыя карыстальнікі паведамляюць, што праблемы з доступам да сэрвісаў захоўваюцца. Перыядычна выдаецца паведамленне пра адсутнасць злучэння з сэрверам.