«Нік і Майк» аб удзеле беларускай арміі ў вайне: У Крамля ёсць некалькі варыянтаў

Пуцін спяшаецца.

Пастаўка новых узбраенняў Украіне прымушае карэктаваць планы і паскарацца з чарговай спробай масавага наступу на ўсходзе Украіны, піша Telegram-канал «Нік і Майк».

На тое, каб прыняць нейкую пастанову, засталося крыху больш за два тыдні – трэба вызначыцца да гадавіны пачатку другога этапу ўварвання з тым, што данесці ў «звароце да народа».

Зімбабвійскага турыста нечакана паклікалі «на дыван», сапсаваўшы выходныя.

На стале некалькі варыянтаў. Удзел ва ўварванні ў некалькіх опцыях: адцягваючыя манеўры ў выглядзе імітацыі наступлення з паўночнага кірунку, адпраўка беларускіх вайскоўцаў і прыватных падраздзяленняў на ўсход Украіны або наданне тэрыторыі для прадаўжэння паветраных удараў. Лагістыка і іншае забеспячэнне расейскай агрэсіі па змаўчанні ва ўсіх опцыях. Гэта прадугледжвае ўласнаручнае знішчэнне сілавога кампанента, а таксама канчатковы злом канцэпцыі «абы не было вайны». Расейцы нездарма свае верталёты падалей ад мяжы прыбралі. Абсалютна непрадказальная турбулентнасць.

Паглыбленая інтэграцыя ў фармаце або «саюзнай дзяржавы» або «саюзнай дзяржавы» + «правільная Украіна». Гэта мяркуе непазбежную рэканфігурацыю рэжыму. Наколькі доўга праплавае сіняпальцы сінягуб у кааператыве «Возера» і як доўга праіснуе АЗГ хунты без верхавода – адкрытыя пытанні.

Таму ёсць спроба стварыць альтэрнатыўны шлях - у фармаце «пераварочвання старонкі». Атрымліваецца нязграбна, але па-іншаму хунта не ўмее. Дык, і не верыць яна ў тое, што старонка будзе перагорнутая. Сітуацыя на фронце цісне. Будучае выраўноўванне санкцый - таксама.

Расейскі бюджэт пачаў адчуваць на сабе наступствы санкцыяў на нафту і нафтапрадукты. Краіны, якія дапамагалі абыходзіць санкцыі, павольна, але дакладна адварочваюцца. Супрацоўніцтва з ізгоямі прынесла свае выгоды на пачатковым этапе, цяпер рызыкі пачынаюць павялічвацца.

«Візіт на дыван», зварот недакурка да народа, «вялікая размова» з сіняпальцым. Графік на найбліжэйшыя тры тыдні выглядае так.

Дадаткова зважаем на тое, што хунта спачатку звесткі вайсковаабавязаных зверыла, а потым імкліва зрабіла ўсіх прыдатнымі. Думаць аб сваёй бяспецы лепш самому. Дзяржава дакладна не мае намеру клапаціцца пра сваіх грамадзян.