«Оркі лезуць і лезуць»: УСУ ўтрымліваюць стратэгічную вышыню пад Вуглядарам

Украінскія вайскоўцы расказалі пра ўпартыя баі ад першай асобы.

Цяжкія баі прадаўжаюцца пад горадам Вуглядар на поўнач ад Бахмута. Расейскія і ўкраінскія вайскоўцы называюць яго стратэгічнай вышынёй. У брытанскім Мінабароны заявілі, што за апошнія дні Расея, верагодна, перавяла свае выведныя атакі ў раёне Паўлаўкі і Вуглядара ў больш скаардынаваны наступ. Адзначаецца, што расейскія войскі прадоўжаць дамагацца лакальных поспехаў у гэтым сектары, аднак малаверагодна, што ў Расеі дастаткова незадзейнічаных войскаў у гэтым раёне, каб дасягнуць значнага прарыву. Ва ўкраінскім Мінабароны заяўляюць, што адбілі атакі ворага ў раёне Вуглядара.

Што цяпер адбываецца ў горадзе – рэпартаж карэспандэнта «Настоящего Времени» Юліі Гарычовай.

Звычайны выгляд шматпавярхоўкі ў Вуглядары – бязлюдная вуліца і спаленыя суседнія дамы. У горадзе не сціхаюць гукі абстрэлаў. У лесапасадцы за некалькі кіламетраў ад Вуглядара чуваць мінамёты. Паводле словаў вайскоўца УСУ Рамана, расейскія вайскоўцы пачалі атакаваць тры дні таму. «Хацелі прарвацца тут, але я так разумею, нічога ў іх не атрымалася, бо мы як стаялі на месцы, так і стаім», – кажа ён. Паводле словаў іншага ўкраінскага вайскоўца, Аляксандра, для расейцаў Вуглядар – «стратэгічна важная вышыня».

Байцы УСУ кажуць, што за апошні тыдзень нападаў стала істотна больш. На пазіцыі ўкраінскія вайскоўцы заходзяць на два дні, потым мяняюцца. Але гэтыя 48 гадзінаў цяпер даводзіцца працаваць без сну, прызнаецца Аляксандр.

«Напружана вельмі. Чым далей, тым горш, і горш, і горш. Чым далей, тым горш. Оркі лезуць, і лезуць, і лезуць. Кожны дзень усё больш і больш працы. Больш страляем кожны дзень. Усё больш і больш», – кажа ён.

У Генштабе УСУ паведамілі, што 31 студзеня Вуглядар і суседнія населеныя пункты зазналі агнявыя атакі ворага. У расейскім Генштабе пра прасоўванне ў раёне Вуглядара не гавораць, зрабілі справаздачу толькі, што нібыта падбілі некалькі пазіцый украінскіх вайскоўцаў, а прарасейскія тэлеграм-каналы апублікавалі відэа авіяцыі, якая працуе непадалёк ад Вуглядара.

За 13 кіламетраў ад Вуглядара – сяло Багаяўленка, яно цяпер таксама пад няспыннымі абстрэламі расейскіх войскаў. Тут, гаворыць мясцовы жыхар Андрэй, суседзяў засталося блізу сотні. Ён з'язджаць не збіраецца, нягледзячы на відавочную небяспеку для жыцця: «Тут бацькі, а калі мы з'едзем, то што суседзі скажуць?»