Ці можна ў Беларусі піць алкаголь у машыне з уключаным рухавіком

У ДАІ адказалі.

Узімку ўвесь час расце колькасць ахвотных выпіць моцныя напоі «для сагрэву». Калі ўсе месцы ў бары занятыя, а дамы з розных прычынаў не варыянт, аўтааматарам застаецца выкарыстоўваць у гэтых мэтах сваіх жалезных коней.

Але ці можна выпіць ва ўласнай машыне і пры гэтым не зарабіць штраф? Тлумачэнні знайшлі ў Instagram Управы ДАІ Магілёўскай вобласці.

Вас не прызнаюць парушальнікам, калі будзеце распіваць алкаголь у машыне з працоўным рухавіком, печкай ці магнітолай. Важна: транспарт у гэты момант мусіць стаяць на месцы і не рухацца.

Інспектары таксама нагадваюць, што пасля выпітай порцыі алкаголю многім часта хочацца прадаўжэння. Паехаць у найбліжэйшую краму – гучыць зручна. Аднак пры найменшым руху аўто будзьце гатовыя адказаць паводле ўсёй строгасці закона.

Немалая колькасць кіроўцаў за такую спакусу ўжо паплацілася.

Суровае пакаранне

За п'яную язду ў Беларусі прадугледжаныя сур'ёзныя захады пакарання. Сярод іншага, штрафы памерам ад 100 да 200 базавых велічыняў (Br3700–7400) з пазбаўленнем пасведчання кіроўцы на тэрмін ад трох да пяці гадоў у залежнасці ад ступені ап'янення.