Украіна ўпершыню атрымала самы сучасны беспілотны комплекс Luna
6- 8.12.2023, 20:03
- 7,580
![Украіна ўпершыню атрымала самы сучасны беспілотны комплекс Luna](https://i.c97.org/ai/559546/aux-head-1691911915-20230813_un_360.jpg)
Luna NG можа лётаць больш за 12 гадзінаў і здольны весці выведку на адлегласці некалькіх сотняў кіламетраў.
Урад Нямеччыны 8 снежня абнавіў размешчаны на афіцыйным сайце спіс ваеннай дапамогі, якую перадаў або плануе перадаць Украіне для супрацьстаяння ўзброенай агрэсіі РФ.
У новы пакет дапамогі ад ФРГ, які ўжо даставілі ва Украіну, увайшлі:
адзін выведны комплекс Luna NG;
10 выведных беспілотнікаў Vector з запчасткамі (усяго ва Украіну дастаўлены 152 дроны такога тыпу);
шэсць памежна-патрульных аўтамабіляў (усяго 241);
восем грузавікоў Zetros (усяго 232);
100 тыс. аптэчак першай дапамогі (усяго 500 тыс.);
медыцынскія матэрыялы;
70 аўтаматычных гранатамётаў MGW (упершыню);
250 снарадаў калібру 155 мм (усяго больш за 26 тыс.).
Тэрміны гэтых паставак не раскрываюцца.
Нямецкі абаронны канцэрн Rheinmetall 14 жніўня анансаваў разгортванне сістэмы Luna NG ва Украіне. У кампаніі дадалі, што памер замовы, размешчанай цяпер на гэтую сістэму, не перавышае некалькіх дзясяткаў мільёнаў еўраў.
Беспілотная авіяцыйная сістэма Luna NG складаецца з наземнай станцыі кіравання з некалькімі беспілотнікамі. У склад сістэмы таксама ўваходзяць стартавая катапульта, дадатковая страховачная сетка для пасадкі і абсталяванне для хуткага рамонту.
Беспілотнік Luna NG можа лётаць больш за 12 гадзінаў і здольны весці выведку на адлегласці некалькіх сотняў кіламетраў з дастатковым часам прастою над месцам выканання задачы.
Украіна ўпершыню атрымала на ўзбраенне найноўшы нямецкі беспілотны авіяцыйны комплекс.