Перадача Шаранговіча дапамагла «Калгары Флэймз» падолець «Караліну Харыкейнз» у матчы НХЛ
2- 8.12.2023, 12:13
- 1,010
![Перадача Шаранговіча дапамагла «Калгары Флэймз» падолець «Караліну Харыкейнз» у матчы НХЛ](https://i.c97.org/ai/368596/aux-head-1583656027-20200308_hokey_360.jpg)
Беларускі форвард скончыў паядынак з каэфіцыентам карыснасці «1+1».
Беларускі нападнік Ягор Шаранговіч адзначыўся дзейснай перадачай у пераможным матчы «Калгары Флэймз», паведамляе sportnaviny.com.
Хакеісты «Калгары Флэймз» спынілі двухматчавую серыю паражэнняў, падолеўшы ў хатнім паядынку «Караліну Харыкейнз».
Сустрэча, якая адбылася на лёдзе арэны «Скаўшабэнк-Сэдлдоўм», скончылася валявой перамогай «Калгары Флэймз» з лікам 3:2 (0:2, 0:0, 3:0).
Лік у матчы адкрыў нападнік «Караліны Харыкейнз» Стэфан Ноўсэн, які патрапіў у браму галкіпера «Калгары Флэймз» Дасціна Вулфа на 3-й хвіліне першага перыяду.
Праз шэсць хвілін Майкл Банцінг падвойвае перавагу «ўраганаў» вызначыўшыся дакладным кідком на 9-й хвіліне.
У другім адрэзку матча каманды не парадавалі заўзятараў закінутымі шайбамі.
У трэцяй дваццаціхвілінцы хакеісты «Калгары Флэймз» змаглі адыграцца і вырваць перамогу ў каманды гасцей.
Спачатку, швэдскі абаронца «агнёў» Расмус Андэрсан «распячатвае» браму расейскага галкіпера «Караліны Харыкейнз» Пятра Качаткова на 46-й хвіліне супрацьстаяння, затым цэнтрфорвард Конар Зары ўраўноўвае лічбы на табло, дамогшыся парытэту ў ліку на 48-й хвіліне.
Пераможны пункт у паядынку паставіў нападнік «Калгары» Блэйк Коўлман, які замкнуў перадачу беларуса Ягора Шаранговіча на 52-й хвіліне.
Беларускі форвард Ягор Шаранговіч адыграў 21 хвіліну і 24 секунды гульнявога часу, адзначыўшыся 1 асістэнцкім балам і скончыўшы паядынак з каэфіцыентам карыснасці «1+1».
Для Шаранговіча - гэта 6 дзейсная перадача да 5 закінутых шайбаў у 25 згуляных матчах гэтага рэгулярнага сезона НХЛ.
Усяго ў кар'еры НХЛ у беларускага нападніка 230 паядынкаў, у якіх Шаранговіч вызначыўся 58 галамі і 59 асістэнцкімі баламі.
Такім чынам, хакеісты «Калгары Флэймз» перапынілі двухматчавую серыю паражэнняў і з 25 набранымі баламі знаходзяцца на дзясятым радку ў турнірнай табліцы Заходняй Канферэнцыі. «Караліна Харыкейнз» саступіла ў трэцім матчы запар і ўсіх у гасцях. «Ураганы» на восьмай пазіцыі ва Усходняй Канферэнцыі з 29 баламі на балансе.
У наступным матчы «Калгары Флэймз» пазмагаецца на хатняй арэне з «Нью-Джэрсі Дэвілз», а «Караліна Харыкейнз» у гасцявой сустрэчы будзе супрацьстаяць «Ванкуверу Кэнаксу».