У Керчы ўспыхнуў маштабны пажар на газаправодзе
- 8.12.2023, 9:44
- 4,384
![У Керчы ўспыхнуў маштабны пажар на газаправодзе](https://i.c97.org/p/articles/2016/ai-215669-aux-head-20160728_krym_t.jpg)
Акупанты ўтойваюць прычыну.
У горадзе Керчы ў акупаваным расейскімі войскамі ўкраінскім Крыме адбыўся пажар на газаправодзе. Праз надзвычайнае здарэнне амаль 30 тысяч жыхароў засталіся без блакітнага паліва.
Інцыдэнт здарыўся ў ноч на 8 снежня на вуліцы Генерала Пятрова. Пра гэта паведаміў Telegram-канал ASTRA.
Відавочцы знялі відэа з месца здарэння і расказалі, што гарэў газ, які вырываўся з трубы. Аб прычынах узгарання інфармацыі (на 9:00 пятніцы) не было.
![](https://i.c97.org/ai/574611/aux-1702017778-1.jpg)
![](https://i.c97.org/ai/574611/aux-1702017779-2.jpg)
Да месца пажару прыязджалі прадстаўнікі так званай улады - «намеснік кіраўніка адміністрацыі горада» Алег Шаўчэнка і «кіраўнікі керчанскіх філіялаў» энэргетычных арганізацый захопленага Крыму.
Раніцай пажарныя патушылі агонь. Расейскае прапагандысцкае агенцтва напісала, што «часткова пашкоджаная лінія энэргаперадачы». Ад газазабеспячэння адключаныя амаль 30 тысяч жыхароў.