Ваенны эксперт: Аўдзееўка «з'ядае» расейцаў

Алег Жданаў прааналізаваў сітуацыю на асноўных адрэзках фронту ва Украіне.

Расейскія акупанты прадаўжаюць наступальныя дзеянні на важных кірунках фронту – Купянскім, Аўдзееўскім і Запарожскім. А каб не даць Генштабу магчымасць перакідаць часткі з паўночнай мяжы, акупанты ўвесь час тэрарызуюць нашу тэрыторыю дыверсійна-выведнымі групамі (ДВГ). Больш падрабязна пра сітуацыю на асноўных кірунках «Апострофу» расказаў ваенны эксперт Алег Жданаў.

Актывізацыя ДВГ

Вораг спрабуе выкарыстоўваць умовы надвор'я, каб больш раздражняць нас і паказваць свае намеры пранікнення на нашу тэрыторыю. Галоўная мэта гэтых ДВГ на Слабажанскім і Северскім кірунках – не даць магчымасці нашаму камандаванню зняць хоць адну частку або падраздзяленне і перакінуць на іншыя аператыўныя кірункі. Таму вораг цалкам лагічна ўзмацняе дыверсійную дзейнасць, каб зрабіць немагчымым перакідванне ўкраінскіх войскаў.

Купянск

Для расейцаў гэты адрэзак фронту важны найперш станцыяй Купянск-вузлавы, размешчанай на левым беразе ракі Аскол. Гэта транспартная магістраль з расейскіх Валуек у бок Данецкай вобласці. І таму, што мы кантралюем чыгунку, ім сёння даводзіцца нашмат паўднёвей завозіць тэхніку і ўзбраенне і везці яе ў асноўным аўтамабільнай тэхнікай, што расейцаў вельмі не задавальняе.

Таму мы трымаем абарону, каб не даць ворагу выйсці на раку Аскол. Да таго ж там такая мясцовасць, што не разгуляешся. Там пагорыстая тэрыторыя, плюс шмат лесапалосаў, таму шырокім фронтам там у атакі не паходзіш.

Разам з тым з пэўных палітычных прычынаў мы не наносім агнявыя ўдары па перавалачнай базе Валуйкі на тэрыторыі РФ. На тактычнай глыбіні артылерыя наносіць агнявую паразу па месцах засяроджвання войскаў, тэхнікі і назапашванні боепрыпасаў. А вось масаваных удараў па аператыўнай глыбіні ў гэтым кірунку мы не наносім.

Аўдзееўка

Найбольш прыкра, што чалавечага рэсурсу ў расейцаў можа выстачыць. Яны могуць закідваць нас целамі і нам проста можа не хапіць боекамплекту, каб знішчаць такую колькасць ворага.

На некаторых адрэзках сітуацыя крытычная, асабліва ў плане спробаў ачаплення Аўдзееўкі. Але ў нас ёсць шанцы ўтрымаць горад і не даць ворагу пачаць вулічныя баі. Для нас сама Аўдзееўка да гэтага часу выгадная тым, што мы знішчаем вялікія сілы рэгулярнага войска РФ. І чым больш знішчаецца рэгулярных войскаў, тым большым становіцца адсотак мабілізаваных у іншых частках. А іх навучанасць і баявы патэнцыял нашмат меншыя, чым у рэгулярных частак.

Запарожскі фронт

На сёння тут самая цяжкая сітуацыя ў плане ўмоваў надвор'я. Нават людзі не могуць перасоўвацца нармальна праз дажджы і плюсавую тэмпературу. Тэхніка на гэтым адрэзку цяпер не ходзіць увогуле.

Расейцы будуць спрабаваць зрэзаць наш плацдарм у раёне вёскі Рабоціна, але на сёння надвор'е на карысць Украіны. Таму што ўкраінцы цяпер знаходзяцца ў абароне, а ворагу трэба наступаць. Таму ва ўкраінцаў ёсць усе шанцы для ўтрымання плацдарму. А далей паглядзім, як яны змогуць нарошчваць намаганні, паколькі стратэгічнага рэзерву, які можна было б перакінуць з глыбіні Расеі – не існуе як такога. Ёсць актуальная пастаўка асабовага складу для папаўнення стратаў, але гэта не рэзерв. І вораг сёння ўжо вымушаны перакідаць часткі з аднаго кірунку на другі. Гэта сведчыць, што вораг наўрад ці зможа зрэзаць гэты плацдарм.