Першы снег выпадзе ў Беларусі на пачатку кастрычніка?

Чаго чакаць ад «ныральнага атлантычнага цыклону».

Першы ў гэтым сезоне снег з'явіўся ў прагнозах лікавых глабальных мадэляў прагназавання надвор'я. Пахаладанне ў Беларусь пасля анамальна спякотнага верасня прынясе чарговы цыклон з Атлантыкі, растлумачылі сіноптыкі.

Тelegraf.news паглядзеў, калі і ў якіх раёнах метэакарты прадракаюць беларусам першы снег.

«Зіма набліжаецца», – напісалі аўтары тэлеграм-канала пра надвор'е «Надвор'е» і апублікавалі метэакарты з прагнозам сінаптычнай сітуацыі ў Беларусі на найбліжэйшы тыдзень. Першы снег аўтары ТГ-канала зафіксавалі, сярод іншага, у прагнозах глабальнай мадэлі GFS.

GFS (GlobalForecastSystem) – найбольш вядомая глабальная мадэль надвор'я, распрацаваная Нацыянальнай службай маніторынгу атмасферы і акіяна ЗША (NOAA). Гэтая матэматычная мадэль абнаўляецца чатыры разы на дзень і ўлічвае розныя метэаралагічныя зменныя. З яе дапамогай, як правіла, сіноптыкі ствараюць кароткатэрміновыя і сярэднетэрміновыя прагнозы на перыяд да 16 дзён.

«Першы снег GFS разлічвае 8 кастрычніка ў тыле ныральнага атлантычнага цыклону. ECMWF пакуль устрымліваецца», – пракаментавалі аўтары г-канала.

Як відаць на картах, снежны фронт пройдзе па Віцебскай, Менскай, Гомельскай і частцы Гарадзенскай абласцей.

Адзначым, што гэта толькі папярэдні прагноз і да канца не зразумела, ці сапраўды ўжо ў будучыя выходныя ў Беларусі выпадзе першы снег. Не выключана, што халодныя паветраныя масы з Атлантыкі прынясуць у Беларусь толькі пахаладанне. Больш дакладная інфармацыя павінна з'явіцца бліжэй да выхадных – з атрыманнем новых звестак пра рух паветраных масаў сіноптыкі, як правіла, удакладняюць свой прагноз (больш дакладныя кароткатэрміновыя прагнозы сіноптыкі даюць толькі на наступныя 2-3 дні).

Нагадаем, сіноптыкі папярэдзілі, што надвор'е ў першыя дні кастрычніка ў Беларусі будзе вызначацца цыклонамі, якія будуць рухацца міма і кранаць краіну толькі краёчкам. Тым не менш на тэмпературу і ападкі яны паўплываюць.