Польшча перадала Украіне першыя танкі Leopard пасля рамонту

Ідуць работы па рамонце астатніх машын.

Польшча перадала Украіне першыя танкі Leopard, якія былі адрамантаваныя на заводзе Бумар-Лабенды. Працягваюцца працы па рамонце астатніх машын.

«Ужо больш за год мы працуем праз спецыялізаваную кампанію PGZ Service Orel у рамках устаноўленых дачыненняў з украінскім бокам, абслугоўваючы цяжкае абсталяванне на месцах, недалёка ад лініі фронту. Гэта выразна сведчыць аб тым, што нашым галоўным прыярытэтам з'яўляецца наданне рэальнай дапамогі баявым вайскоўцам», – адзначылі ў кампаніі Polska Grupa Zbrojeniowa ў сацсетцы X (раней Twitter).

PGZ таксама падкрэсліла, што ўвесь час пашырае супрацоўніцтва ў пастаўках украінскаму боку боепрыпасаў, запасных частак і абслугоўванню абсталявання.

Рамонт украінскай тэхнікі ў Польшчы

У ліпені 2023 года міністр абароны Польшчы Марыюш Блашчак паведаміў, што на польскай тэрыторыі пачаў працаваць цэнтр рамонту і тэхнічнага абслугоўвання танкаў Leopard, якія выкарыстоўваюцца на полі бою ва Украіне. Яго адкрылі ў горадзе Глівіцэ.

Пасля ў Нямеччыне пацвердзілі, што дамовіліся з Польшчай аб стварэнні цэнтра рамонту танкаў Leopard 2, пашкоджаных у баях на перадавой ва Украіне.