Украіне перадалі антыдронавую сістэму Slinger: што пра яе вядомае

Яе вырабіла і адправіла ва Украіну аўстралійская кампанія.

Аўстралійская кампанія вырабіла і перадала Украіне сістэму-забойцу дронаў Slinger. Яна дапаможа Украіне лепш абараніць неба.

Пра гэта заявіў прадстаўнік кампаніі Electro Optic Systems Мэт Джонс, паведамляе РБК-Украіна са спасылкай на ABC.

Сістэму збіраюць на прамысловай пляцоўцы ў Канберы (Аўстралія), яна дапаможа Украіне лепш абараняцца ад нападаў расейскіх дронаў.

Гармата, усталяваная на кузаве пікапа, адсочвае цэль і з'яўляецца часткай сістэмы ўзбраення, якая збівае варожыя дроны. Гэтая сістэма называецца Slinger і яна прызначаная для барацьбы з дронамі коштам, які можа дазволіць сабе Украіна.

Мэт Джонс сказаў, што кампанія бачыць масавае распаўсюджванне пагроз ад дронаў, якімі атакуюць Украіну.

«Праблема ў тым, што тыпы сістэм, якія Украіна цяпер выкарыстоўвае для барацьбы з дронамі, занадта дарагія, каб знішчыць цэль коштам 10 000 або нават 1000 даляраў», - сказаў ён.

Slinger выкарыстоўвае складаную тэхналогію

Аўстралійскі генерал-маёр у адстаўцы Мік Раян заявіў, што вайна назаўжды змяніла Украіну, а робаты адыгрываюць вялікую ролю над лініяй фронту.

Іранская мадэль дрона «Шахед», якая выкарыстоўваецца Расеяй для паражэння танкаў і гарадоў, каштуе блізу 31 000 даляраў.

«Да нядаўняга часу нам даводзілася выкарыстоўваць вельмі дарагія ракеты, каб збіваць такія аб'екты», – сказаў Раян.

Інжынер-выпрабавальнік кампаніі EOS Шарлота Капер распавяла, што сістэма Slinger выкарыстоўвае складаную тэхналогію для дасягнення выніку. Яна выкарыстоўвала джойсцік, каб сачыць за дронам на экране навядзення сістэмы.

«Я проста сачу за тым, каб ён заставаўся на правільным шляху, і калі мы атрымаем сігнал, мы зможам стрэліць і збіць дрон», - сказала яна.

Яна ўдакладніла, што гэтаму вельмі хутка і лёгка навучыцца. Чалавеку не трэба шмат ведаць аб тэхналогіі.

Калі сістэму Slinger даставяць ва Украіну

У мінулым месяцы пасол Украіны ў Аўстраліі Васіль Мірашнічэнка падчас выпрабаванняў на свае вочы ўбачыў, як Slinger можа збіваць дроны. Кошт Slinger складае не менш за 1,55 мільёна даляраў за сістэму. Мэтай праекта з'яўляецца знішчэнне дронаў у кошце ад 155 да 1550 даляраў за адно сутыкненне.

Чакаецца, што дзесяць Slinger, якія цяпер вырабляюцца, будуць дастаўленыя Украіне да канца года ў рамках пакета вайсковай дапамогі ЗША.

Прадстаўнік Міністэрства абароны заявіў, што аўстралійскі ўрад мае намер зрабіць свой сёлетні ўнёсак ва Украіну. Але пакуль няма ніякіх планаў дадаць Slingers да 710 млн даляраў аўстралійскай вайсковай дапамогі Украіне.

Процівадронавы баявы модуль вытворчасці аўстралійскай кампаніі Electro Optic Systems, абсталяваны 30-мм аўтаматычнай гарматай Bushmaster M230LF.

Прыцэльванне адбываецца з дапамогай оптыка-электроннага комплексу з начным інфрачырвоным дэтэктарам (можа круціцца незалежна ад гарматы) і 4D-радару Echodyne EchoGuard, таксама модуль абсталяваны датчыкам ветру. Разам з найноўшымі боепрыпасамі вытворчасці Northrop Grumman з радыёчастотным набліжэннем, паводле заяваў вытворцы, комплекс можа сапраўды знішчаць малыя БПЛА адным стрэлам.

Невялікая вага (да 400 кг) дазваляе ўсталяванне на лёгкую тэхніку, такую як HMMWV ці «Казак».