Ва Уладзівастоку праз санкцыі перасталі працаваць паркаматы

Іх давялося адключыць.

У сувязі з уведзенымі Еўразвязам санкцыямі супраць Расеі ва Уладзівастоку спынілі працу паркаматы. Пра гэта паведамляе «Медуза».

Паводле звестак выдання, аператар парковак ва Уладзівастоку «Лічбавае Прымор'е» быў вымушаны 1 кастрычніка адключыць устаноўленыя ў цэнтры горада паркаматы.

Як растлумачылі ў кампаніі, такая пастанова была прынятая пасля таго, як кампанія Flowbird паведаміла пра спыненне падтрымкі праграмнага забеспячэння і апаратнай часткі паркаматаў праз санкцыі, накладзеныя на Расею Еўразвязам.

Кампанія, заявілі ў «Лічбавым Прымор'і», вырабляе аналіз і ацэнку тэрмінаў мадэрнізацыі парковачнага абсталявання. Тым часам кіроўцаў папрасілі карыстацца іншымі спосабамі аплаты паркоўкі.